Biylǵy UBT-da talapkerlerdiń ortasha balynyń tómen bolýyna testileýdiń meilinshe ashyq ótýi sebep bolýy múmkin. Ulttyq testileý ortalyǵynyń direktory Rýslan Emelbaev ortalyq kommýnikatsiialar qyzmetinde ótken brifingide osyndai pikir bildirdi, dep habarlaidy QazAqparat.
«Biyl UBT tapsyrǵandardyń 33 paiyzy ortasha ball jinai almaǵan. Sebebi nede? Daiyndyq tómen be, álde suraqtary qiyn ba?» dep surady BAQ ókili.
Ulttyq testileý ortalyǵy direktorynyń aitýynsha, munyń birneshe sebebi bar.
«Shekti baldy jinaǵandardyń sany ótken jylmen salystyrǵanda 7% kóbeiip otyr. Árine, shekti baldy óte almaýdyń birneshe sebepteri bolýy múmkin. Biyl suraqtar jańartylǵan bilim mazmunyna qarai qurastyryldy. Soǵan qaramastan, shekti mejeden ótkenderdiń úlesi 7 paiyz artyp otyr», - dedi ol.
Aitýynsha, búginge deiin oqýshylar arasynda test suraqtaryn jelige salý tendetsiiasy beleń alyp kelgen.
«Belgili ortalyqtar nemese belgili tulǵalar arnaiy telegram kanaldar arqyly test suraqtaryn jeli qoldanýshylarynyń nazaryna usynyp otyrǵan. Tipti 76 myń tirkelýshisi bar kanaldar osylai jumys istegen. Testen shyqqan balalardyń suraqtaryn jinap, jariialap otyrǵan. Biyl biz suraqtardy kúnbe-kún qaitalanbaityndai etip istedik. Baldyń biraz tómen bolýyna osy áser etti. Jalpy biyl jattaýǵa, faktologiiaǵa beiimdelgen suraqtar, ásirese, Qazaqstan tarihynan áldeqaida azaidy. Biyl test suraqtaryn áleýmettik jelige salý faktileri bolǵan joq. Sebebi test suraqtaryn kommertsiiaǵa ainaldyrǵan iri-iri telegram kanaldar jabyldy. Quzyretti organdarǵa ótinish bildirip, jolyn kestik. Sonda jattaýǵa beiimdelgen suraqtardyń azaiyp, suraqtardy áleýmettik jelige salý múmkindiginiń shektelýi ortasha baldyń tómen bolýyna áser etýi múmkin dep aita alamyn», - dedi Rýslan Emelbaev.
