28 shildede Qazaqstanda koronavirýs boiynsha taǵy rekordtyq kórsetkish tirkeldi. Sársenbi kúni 7479 adamnyń analizinen koronavirýs anyqtaldy. Indet bastalǵaly beri bir kúnde osynsha kóp naýqas anyqtalmaǵan. Odan bólek, taǵy 262 adam pnevmoniianyń koronavirýsqa uqsas túrine shaldyqqan.
Elde koronavirýspen bailanysty adam ólimi kórsetkishi joǵary. 27 shildede 97 adam qaitys bolǵan: 81 adam – koronavirýstan, 16 adam koronavirýs pnevmoniiasynan kóz jumǵan dep aitylady.
Densaýlyq saqtaý ministrliginiń aitýynsha, maýsym aiymen salystyrǵanda qazir aýrý ósimi 5,2 paiyzǵa artqan. Barlyq aimaqta virýstyń kúsheigeni baiqalady.
Sársenbi kúni Nur-Sultanda – 1571, Almaty qalasynda – 1450, Qaraǵandy oblysynda 1011 adamnan koronavirýs anyqtaldy. Shymkent pen Atyraý oblysynda bir táýlikte 400-den astam naýqas tabylǵan. Qalǵan oblystar men qalalarda ortasha eseppen 200-300 tóńireginde naýqas anyqtalyp júr. Qazir "sary aimaqta" Túrkistan oblysy ǵana qaldy.
Bilik indettiń órshýin delta varianttyń taraýymen bailanystyrady. "Delta" koronavirýstyń kádimgi túrine qaraǵanda jyldam juǵady jáne asqynýy da tez. Resmi málimet boiynsha, Qazaqstanda delta maýsym aiynda tirkelgen.
29 shildedegi málimet boiynsha 90 767 adam koronavirýs infektsiiasynan (88 495 KVI+ jáne 2 272 KVI-) emdelip jatyr.
25 714 patsient statsionarda, 65 053 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
1 573 adamnyń jaǵdaiy aýyr,
332 patsienttiń jaǵdaiy óte aýyr,
154 naýqas jasandy tynys alý apparatynda jatyr.
Bir kún buryn densaýlyq saqtaý ministri Aleksei Tsoi keibir aimaqta statsionarlar tolyp qaldy, oryn tapshylyǵy týyndaýy múmkin dep eskertken. Sońǵy málimet boiynsha, elde aýrýhanalardyń 53 paiyzy, reanimatsiialardyń 43 paiyzy bos emes.
Indet bastalǵaly beri 557 myńnan astam adamnyń koronavirýs testi oń shyqqan. Budan bólek, PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 60 myńnan astam adam shaldyqqan.
2020 jyldyń naýryz aiynan beri 5700 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3676 adamnyń ólimine sebep bolǵan.
Kei sarapshylar koronavirýs boiynsha resmi málimet tym tómendetilgen, shyn máninde virýs juqtyrǵandar men odan qaitys bolǵandar áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5,3 millionǵa jýyq adam vaktsinanyń birinshi dozasyn alǵan. Ekpeniń tolyq dozasyn alǵandar 3,5 millionnan asty.
