AQSh, EO-nyń Syrtqy ister jónindegi joǵary ókili, Ulybritaniia, Kanada, Germaniia, Avstraliia, Polsha, Ýkraina, Ońtústik Koreia, Afrika men Latyn Amerikasynyń keibir memleketteri elden ketkisi keletinderge múmkindik jasaý kerek ekenin, Aýǵanstan azamattaryna kómektesýge daiyn ekenin bildirdi.
"Aýǵandar men ketkisi keletin sheteldikterge ketýge ruqsat berilýi kerek. Joldar, áýejailar men shekaralar ashyq bolyp, tynyshtyq saqtalýy tiis. Aýǵan halqy qaýipsiz jáne laiyqty ómir súrýge laiyq. Biz halyqaralyq qoǵamdastyqta olarǵa kómektesýge daiynbyz", - delingen hatta.
Qujatta elder Aýǵanstandaǵy jaǵdaiǵa bailanysty qaýipsizdikti qamtamasyz etý úshin jumys istep jatqandyǵy aitylǵan. Olar barlyq tarapty sheteldikter men aýǵan elinen ketkisi keletinderdiń qaýipsiz túrde ketýine jaǵdai jasaýǵa jáne qurmetteýge shaqyrdy. Avtorlar Aýǵanstanda bilikke otyrǵandarǵa adam ómirin qorǵaýǵa, sondai-aq qaýipsizdik pen qoǵamdyq tártipti tez arada qalpyna keltirýge jaýapty ekenin eske saldy.
Eske salaiyq, "Taliban" qozǵalysynyń sodyrlary Aýǵanstannyń astanasy Kabýlǵa kirip, eldegi soǵystyń aiaqtalǵanyn málimdedi. Kabýl áýejaiyna júzdegen adam jinalyp, elden ketýge tyrysty.
Buǵan deiin Prezident Qasym-Jomart Toqaev Aýǵanstandaǵy jaǵdai týraly málimdeme jasaǵan bolatyn. Ol Aýǵanstan Islam Respýblikasyndaǵy qazaqstandyqtar men diplomattardyń qaýipsizdigin qamtamasyz etý úshin sharalar qabyldaýdy tapsyrdy. Memleket basshysy Qazaqstan Aýǵanstandaǵy shielenistiń ýshyǵýyna alańdaitynyn jáne oqiǵalardyń damýyn muqiiat qadaǵalap otyrǵanyn aitty.
