Almatyda órtten 6 adamdy qutqarǵan Qazaqstannyń aýyr atletikadan chempiony Dáýren Rymqulov «Órtte kórsetken qaisarlyǵy úshin» medalimen marapattaldy, dep habarlaidy "Ult aqparat".
Alty adamdy, onyń ishinde tórt balany órtten qutqarǵan Dáýren Rymqulov QR Ishki ister ministri Erlan Turǵymbaevtyń buiryǵymen «Órtte kórsetken qaisarlyǵy úshin» medalimen marapattaldy.
Sportshyǵa medaldi Almaty qalasy Tótenshe jaǵdailar departamentiniń bastyǵy Serik Áýbákirov tabys etti.
«Ainalany, adamdardy qorǵaýdy óziniń paryzy sanaityn naǵyz qazaqstandyq azamatqa tán batyldyq pen erlik kórsetkenińiz úshin alǵys aitamyz, kóptegen jyldar boiy kásibi sportpen shuǵyldaný Sizge birneshe adamnyń ómirin saqtap qalýǵa múmkindik berdi»,-dep atap ótti Serik Áýbákirov.
Esterińizge sala keteiik, 14 tamyzda keshki saǵat 21: 33-te qalalyq Tótenshe jaǵdailar departamentiniń «101» pýltine Almaly aýdany Radostovtsa kóshesi №49 úiden órt shyqqany týraly habarlama kelip tústi. Órt sóndirý brigadasy oqiǵa ornyna kelgende bes qabatty turǵyn úidiń úshinshi qabatyndaǵy páterdiń as bólmesi ashyq jalynmen janyp jatty. Óz ómirin qaterge tikken Dáýren órt sóndirý esepteri kelgenge deiin páterde qalǵan 6 adamdy qutqardy.
Shuǵyl jaǵdailarda adamdardy qutqaryp, belsendi azamattyq ustanym tanytqany jáne jas urpaqqa úlgi kórsetkeni úshin Almaty qalasy Tótenshe jaǵdailar departamentiniń basshylyǵy ony marapattaýǵa usynys jasaǵan bolatyn.
Dáýren bul áreketin erlik sanamaidy. Kez kelgen adam qysyltaiań sátte osylai áreket etetinine shák keltirmeitin 33 jastaǵy sportshy Dáýren Rymqulov halyqaralyq týrnirlerdiń chempiony, Aziia men Álem chempionatynyń qatysýshysy.
