Astanadaǵy 5 balanyń ólimi búkil halyqty eseńgiretti. Kózinen jasy, kóńilinen zary tógilgen ana men ákeni jubatar sóz tabyla qoimas mundaida. Tek bul jazbamyzda qara jamylǵan otbasynyń qaiǵysyn teń bólispekke umtylǵan barlyq qazaqstandyqtardyń bastamalaryn atap ótýdi jón kórdik.
Kóktalda búgin bes balany sońǵy saparǵa shyǵaryp saldy. Rásimge kelgen halyqtyń qarasy mol. Qabyrǵasyn bir-birlep sókseń de, qabaq shytpas erlerdiń ózi kóz jasyna erik berdi. Halyqtyń mol shoǵyry tirkelgen áleýmettik jelini ashsańyz, bul oqiǵaǵa qabyrǵasy qaiyspaǵan, kóńil aitpaǵan adamnyń kemde-kem ekenin kóresiz. Shiettei balalaryn asyraý úshin tún qatyp júrip, jumysqa jegilgen áke men shesheniń bir emes, tórt nesiesiniń bary belgili boldy. Áleýmettik jelide taraǵan otbasynyń shotyna halyq shama-sharqynsha aqsha aýdaryp jatyr.
Almaty jurtshylyǵy búgin Astanada úiinde órtenip ketken 5 balany eske alý úshin 28 Panfilovshylar parkindegi məńgilik alaý mańyna jinaldy. Qaiǵyly qaza qabyrǵasyn qaiystyrǵan jurtshylyq únsiz ǵana alaý basyna kelip, gúl shoqtary men oiynshyqtar, shamdar qoia bastady.
Mundai aza tutý sharasy elimizdiń birqatar qalasynda júrip jatyr.
Qazaqstan Musylmandary dini basqarmasy qaraly otbasyǵa búgin 13 million teńge aýdarylǵaly otyrǵanyn habarlady. «Áziret Sultan» meshitiniń ustazy Maqsatbek Qaiyrǵaliev búgin 13,4 mln teńge jinalǵanyn, bul soma qasiret shekken januiaǵa tabystalatynyn aitqan. Izin ala Astananyń bas imamy Naýryzbai qajy Taǵanuly bes balasynan aiyrylǵan otbasyǵa úi alyp beretinderin jetkizdi.
«Biz olardyń ata-anasymen sóilestik. Aqyldasa kele, meshit atynan baspana satyp alyp beremiz dep sheshtik. Biz osylai kelistik», - dedi ol.
Kaspii bank tarapynan da otbasyǵa kómek berildi. Óz qoldaýy retinde bank qara jamylǵan otbasynyń nesiesin jabatyn boldy.
Bolǵan oqiǵaǵa qatysty memlekettik organdar da kómek qolyn sozýda. Mádeniet jáne sport ministrliginiń qyzmetkerleri qaiǵydaǵy otbasy shotyna bir kúndik jalaqylaryn aýdarmaq.
Bul jaqsylyqtyń bári de eseńgiregen áke-shesheniń qaiǵy júgin bir mysqal da azaita almas. Dese de, bári de shyn nietimen kómek qolyn sozyp jatyr...
Eske sala keteiik, 4 aqpan kúni túnde «Kóktal-1» turǵyn úi alabynda jeke úidiń aýlasynda turǵyzylǵan ýaqytsha baspanadan órt shyqty. Órtti sóndirý barysynda 2006, 2008, 2014, 2016, 2018 jyldary týǵan 5 qyz balanyń denesi tabyldy.
Qaiǵyly oqiǵa kezinde bes balanyń ata-anasy túngi jumysta bolǵan.
Búgin 5 balany elordalyqtar aqtyq saparǵa shyǵaryp saldy. Sondai-aq, Elbasy órtte qaza bolǵan balalardyń otbasyna kóńil aitty.
