El Prezidenti Qasym-Jomart Toqaevtyń bastamasymen qolǵa alynǵan aýdandyq mańyzy bar qalalar, aýyldar, kentter men aýyldyq okrýgter ákimderiniń alǵashqy tikelei sailaýynyń qorytyndysy boiynsha biyl «Nur Otan» partiiasynyń músheleri okrýgterdiń 87,5%-ynda jeńiske jetti. Óńirlik konferentsiialarda partiiadan usynylǵan 670 kandidat, sondai-aq 87 ózin-ózi usynǵan nurotandyq ákim bolyp sailandy.
Jeńiske jetken nurotandyqtardyń 47%-y – jańa tulǵalar, onyń ishinde bilim berý salasynyń ókilderi, kásipkerler, fermerler bar. Ortasha jasy – 46 jas. Áielder – 10%, 35 jasqa deiingi jastar sany – 18%. Kópshiligi bastaýysh partiia uiymdarynyń tóraǵalary, partiiaishilik praimerizdiń qatysýshylary.
«2021 jylǵy 25 shildede Memleket basshysynyń bastamasy boiynsha ótken aýyl ákimderin tikelei sailaý partiialardyń jergilikti jerlerde halyqpen qoian-qoltyq jumys isteýine júieli serpin berdi. Básekeli kúres nátijesinde nurotandyqtar sailaý okrýgteriniń basym kópshiliginde jeńiske jetti. Sonymen birge, ózin-ózi usynǵandar jáne basqa 5 partiianyń ókilderi de ákim bolyp sailandy. Osylaisha, barlyq deńgeilerde proportsionaldy sailaý júiesine kóshý partiialardyń institýtsionaldyq mańyzy men rólin nyǵaitty. Keń turǵydan alǵanda, bul sailaý azamattardyń sheshimder qabyldaý protsesine qatysýyn jandandyrýǵa, sondai-aq esep beretin memleketti qalyptastyrýǵa baǵyttalǵan, Elbasy usynǵan 5 institýtsionaldy reformanyń naqty iske asyrylýyn rastady», - dep atap ótti bileýshi partiia Tóraǵasynyń birinshi orynbasary Baýyrjan Baibek buǵan deiingi óziniń «Partiialyq júie – memlekettiliktiń institýtsionaldyq tiregi» atty maqalasynda.
Eske sala keteiik, biyl aýyl ákimderiniń alǵashqy tikelei sailaýy 864 aýyldyq okrýgte ótti. Onyń ishinde 730 ákim 25 shildede, taǵy 134 ákim tamyz – jeltoqsan ailary aralyǵynda sailandy.
«Aq jol» Demokratiialyq partiiasy, Qazaqstannyń Halyq partiiasy, «Adal», «Aýyl» jáne Jalpyulttyq sotsial-demokratiialyq partiialarynyń kandidattary aýyldyq okrýgterdiń 8,5%-ynda jeńiske jetti. Aýyldyq okrýgterdiń 4%-ynda birde-bir partiianyń ókili bolyp tabylmaityn ózin-ózi usynǵan úmitkerler sailandy.
Partiia baspasóz qyzmetiniń málimeti boiynsha, «Nur Otan» partiiasynyń barlyq kandidattary partiianyń Saiasi menedjment mektebi bazasynda seminarlardan ótip, qajetti uiymdastyrýshylyq, ádisnamalyq jáne basqa da qoldaýmen qamtamasyz etildi. Árqaisysynyń óz sailaýaldy baǵdarlamasy bar, ol partiianyń qoldaýymen aýmaqtardyń múmkindikterin eskere otyryp, tiisti resýrstarmen qamtamasyz etilgen.
