2020 jyldyń 8 aiynda Qazaqstannyń jumys kúshi kóp óńirlerinen jumys kúshi tapshy óńirlerine jalpy sany 4 386 adam qonys aýdardy, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Ministrliktiń málimetterine qaraǵanda, qonys aýdarǵandardyń ishinde eńbekke jaramdy jastaǵy 2 303 adamy bar 1 273 otbasy qonys aýdardy. Eńbekke jaramdy otbasy músheleriniń ishinen 1 652 adam jańa turǵylyqty jeri boiynsha jumysqa ornalasty.
Nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasynda eńbek resýrstarynyń utqyrlyǵyn yntalandyrý úshin Úkimet aiqyndaityn óńirlerge erikti túrde qonys aýdaratyn adamdarǵa memlekettik qoldaý sharalary kózdelgen.
Almaty, Jambyl, Mańǵystaý, Túrkistan, Qyzylorda oblystary, sondai-aq Nur-Sultan, Almaty jáne Shymkent qalalary qonys aýdarýshylardyń shyǵý óńirleri bolyp aiqyndaldy. Qabyldaý aimaqtary: Aqmola, Shyǵys Qazaqstan, Qaraǵandy, Qostanai, Pavlodar, Soltústik Qazaqstan oblystary.
Memlekettik baǵdarlama aiasynda erikti qonys aýdarýǵa qatysýshylar úshin sýbsidiia túrinde memlekettik qoldaý sharalary usynylady. Atap aitqanda:
- kóshýge-otbasynyń árbir múshesine 35 AEK-ten bir jolǵy tólem (92 myń teńge);
- 12 ai ishinde ai saiyn 15-ten 30 AEK-ke deiin (39 myńnan 79 myń teńgege deiin) turǵyn úidi jaldaý (jalǵa alý) jáne kommýnaldyq qyzmetterdi tóleý boiynsha shyǵyndardy óteý úshin otbasy músheleriniń sanyna jáne jergilikti jerge bailanysty tólenedi.
Sondai-aq qonys aýdarýshylardy turǵyn úimen qamtamasyz etý boiynsha sharalar qabyldanýda.
Soltústik Qazaqstan oblysynda jeke turǵyn úi qurylysynyń 714 nysany salynady, Pavlodar oblysynda qonys aýdarýshylardy turǵyn úimen qamtamasyz etý úshin 441 páter satyp alynady.
2020 jyly barlyǵy 5 825 adamdy (1 631 otbasy) kóshirý josparlanýda.
