Búginde birqatar óńirde karantin sharalary kúsheitilip jatyr. Osyǵan bailanysty halyq arasynda 42 500 teńgeni qaita tóleý máselesi kóterildi. Eńbek jáne halyqty áleýmettik qorǵaý ministrligi birjolǵy tólem qandai jaǵdaida beriletinin túsindirdi, dep habarlaidy Sputnik Qazaqstan.
"Ótken jyly 42 500 teńge kólemindegi tólem memlekettik áleýmettik saqtandyrý qorynyń esebinen jasalǵan bolatyn. Ol aqsha jumys isteitin, biraq tótenshe jaǵdai men karantin sharalary engizilýine bailanysty tabysynan aiyrylǵan adamdarǵa berildi", - deidi ministrlik ókilderi.
Resmi málimetke sáikes, birjolǵy tólemdi 4,6 millionnan astam adam aldy. Qordan bólingen qarjynyń jalpy somasy 476,3 milliard teńgeni qurady. Al osy jolǵy shekteýler bizneske qatysty jáne demalys kúnderi kúsheitiledi. Búginde kásipkerlerge salyqtyq jáne taǵy basqa jeńildikter jasalyp otyr.
"Osyǵan bailanysty búginde 42 500 teńgeni qaita tóleý máselesi qaralyp jatqan joq", - dep atap ótti mamandar.
Aita keteiik, ótken jyly 42 500 teńge eki ret tólendi. Aldymen tótenshe jaǵdai kezinde shaǵyn jáne orta biznes nysandarynyń jumysshylaryna berilse, odan keiin 5 shilde men 16 tamyz aralyǵynda engizilgen qatań karantin úshin bir jarym ailyq tólem – 63 750 teńge aýdaryldy.
