4 jasqa tolǵan kezde arnaiy balalar úiindegi sábi jetimder úiine nemese múgedekterge arnalǵan arnaiy ortalyqqa aýystyrylady. Bul bala psihologiiasyna keri áser etedi. Bul týraly Nur-Sultan qalasy máslihatynyń kezekti sessiiasynda aityldy, dep habarlaidy QazAqparat.
«Ómirlik qiyn jaǵdaiǵa tap bolǵan balalardyń qalyptasýyna aitarlyqtai nuqsan keltiirp otyrǵan taǵy bir faktor bar. Mysaly, tastandy bala perzenthanadan arnaiy balalar úiine ákelinedi. Jańa týǵan sábidiń kózin asha salyp kóretini – tárbieshi. Ol tárbieshini anasyndai qabyldaidy, basqasha bolýy múmkin emes. Arnaiy balalar úii – sábidiń otbasy bolyp sanalady. Al biz sol sábi 4 jasqa tolǵan kezde jetimder úiine nemese múgedekterge arnalǵan arnaiy ortalyqqa beremiz. Maman retinde aitarym, balanyń 1-6 jas aralyǵyndaǵy ómiri balanyń bolashaq ómirine azyq bolady. Bala ómiriniń negizgi irgetasy osy kezeńde qalanady», - deidi Nur-Sultan qalasy máslihatynyń depýtaty Lázzat Razbekova-Tileýhanova.
Ol balany 4 jastan bastap basqa ortaǵa alyp barýdyń ziiany týraly aitty. Birinshiden, balaǵa psihologiialyq turǵyda ziian keltiremiz. Ekinshiden, arnaiy balalar úiinde kóbine aǵaiyndylar bolady.
«Mysaly, bireýi 4 jasta bolsa, ekinshisi 5 jasta. Sonda aǵaiyndy eki balany 4 jasqa tolǵannan keiin eki jaqqa bólemiz. Al múmkindigi shekteýli balalarǵa keletin bolsaq, jaǵdai tipten múshkil. Arnaiy balalar úiinde múgedek bala qasyndaǵy saý balalarmen birge ósedi. Olarǵa qarap eliktep ósedi. Al biz ol múgedek balany jaqsy ortadan alyp, múgedekterge arnalǵan ortaǵa tyǵa salamyz. Osylaisha biz QR Múgedek týraly zańynyń 14-baby, 1-tarmaǵy jáne QR Bilim týraly zańynyń tarmaqtarynyń buzylýyna jol berip otyrmyz. Osy máseleni sheshý úshin arnaiy balalar úiinde sábi 6 jasqa deiin bolýy úshin biýdjetten qosymsha 32 386 000 qarajat bólýdi qarastyrýdy suraimyz», - deidi ol.
