QR Ishki ister ministrligi quqyq tártibin qamtamasyz etip, halyqty qylmystan qorǵaý úshin «Qazaqtelekomnyń» beinebaqylaý júiesin paidalanady. Bul týraly QR Ishki ister ministrliginiń resmi ókili Nurdildá Oraz aityp berdi, dep habarlaidy QazAqparat tilshisi.
«Senbi kúni Ishki ister ministri Erlan Turǵymbaev pen «Qazaqtelekom» AQ Basqarma Tóraǵasy Qýanyshbek Esekeev Aqmola oblysynyń Aqkól qalasynda qalalyq beinebaqylaý júielerin damytý jáne aýqymdy derekterdi taldaýdy qoldaný salasyndaǵy ózara yntymaqtastyq týraly memorandýmǵa qol qoidy. Aqkól qalasy – «Smart City» jobasy iske asyrylǵan Qazaqstandaǵy birinshi qala», - dedi resmi ókil ministrlik uiymdastyrǵan brifingte .
Eske sala ketsek, 2017 jyldan bastap elimizde «Qaýipsiz qala» tujyrymdamasy aiasynda qalalardy beinebaqylaý júielerimen qamtamasyz etý jobasy iske asyrylýda. Respýblika boiynsha 350 myń páterdi qamtityn kireberisterde 34 myńǵa jýyq beinekamera ornatylǵan.
«Memorandým aiasynda Qazaqtelekomnyń biryńǵai beinebaqylaý júieleri IIM júiesine biriktiriletin bolady. Bul podezderdegi kameralardan politsiianyń jedel basqarý ortalyqtarynyń monitorlaryna sýretterdi shyǵarýǵa jáne qoǵamdyq tártipti buzýǵa jedel nazar aýdarýǵa múmkindik beredi. Búginde IIM óńirlerdiń jedel basqarý ortalyqtaryna qosylǵan 6 myńǵa jýyq beinebaqylaý kameralaryn paidalanady. Olardyń kómegimen jyl basynan beri 5,5 myńnan astam qylmys ashylyp, 408 myńǵa jýyq ákimshilik quqyq buzýshylyqtyń joly kesildi», - deidi N. Oraz.
