Jyl basynan beri kóshi-qon zańnamasyn buzýdyń 13,5 myń faktisi tirkelgen, dep habarlaidy "Ult aqparat".
Ishki ister ministrliginiń resmi ókili Nurdildá Oraz vedomstvonyń kezekti onlain brifinginde «Migrant» jedel is-sharasynyń qorytyndysyn jariialady.
«7-16 maýsym aralyǵynda IIM ótkizetin «Migrant» jedel is-sharasy aiaqtaldy. Pandemiiaǵa bailanysty myńdaǵan sheteldikter Qazaqstan aýmaǵynda qalyp, elde shyǵa almaǵan edi. Ishki ister ministrliginiń kóshi-qon qyzmeti bul adamdarǵa qujattaryn rásimdegýe kómektesti. Jyl basynan beri politsiia qyzmetkerleri 5 myńnan astam migrantqa, tólqujattarynyń merzimi ótken 956 sheteldikke elden shyǵýǵa kómektesti», - dedi ministrlik ókili.
Onyń aitýynsha, kóshi-qon zańnamasyn qasaqana buzatyn adamdardy anyqtaý úshin politsiia qyzmetkerleri shetel azamattary toptasyp turatyn jerlerge tekserister júrgizgen.
«Shetel azamattarynyń jaldamaly eńbegin zańsyz paidalanatyndardyń turǵyn úi sektoryna, qurylys nysandaryna, bazalarǵa, uiymdar men zańdy tulǵalardyń mekenjaiyna reidter uiymdastyrylyp, avtokólikter tekserildi. Operatsiia júrgizý kezinde kóshi-qon zańnamasyn buzǵan 13,5 myń fakti anyqtaldy. Onyń ishinde sheteldikterdiń elde bolý merzimin buzýmen bailanysty 10 myń fakti, elimizde zańsyz eńbek etip júrgen sheteldikter boiynsha shamamen 3316 fakti tirkeldi. Sheteldik jumys kúshin zańsyz paidalanǵany úshin 702 jumys berýshige ákimshilik jaza taǵaiyndaldy», - dedi resmi ókil.
Nurdildá Oraz sheteldik azamattardy aýyr jumyspen birge tilenshilikke tartý da jii kezdesetinin aitty.
«Elge kelgen sheteldikterdi ishki ister organdaryna ýaqtyly habarlamaǵany úshin 5 myńnan astam jeke jáne zańdy tulǵalarǵa shara qoldanyldy. Qaiyrshylyqpen ainalysqan 62 sheteldik jaýapkershilikke tartyldy. Mysaly, Shymkent qalasynda 2 zańdy tulǵanyń aýmaǵynda ruqsat qujattarynsyz eńbek etip júrgen 34 sheteldik anyqtaldy. Semei qalasyndaǵy kópqabatty turǵyn úidiń qurylysynda qujatsyz jumys istep júrgen 16 sheteldik belgili boldy», - dedi IIM resmi ókili.
