QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda elimizdegi epidemiologiialyq ahýal qaraldy. Jeke qorǵanysh quraldarynyń, meditsinalyq tehnika men jabdyqtardyń elimizde shyǵarylýy týraly indýstriia jáne infraqurylymdyq damý ministri Beibit Atamqulov baiandady, dep habarlaidy primeminister.kz saity.
Meditsinalyq maska shyǵarý
Otandyq kásiporyndar táýlik saiyn 900 myń maska shyǵarady. Qoimalarda 15 mln maska bar, onyń 10 mln danasyn «SK-Farmatsiia» JShS jetkizedi. Kásiporyndar taýardy jóneltýge daiyn.
Meditsinalyq perchatka shyǵarý
Kún saiyn 330 myń jup perchatka shyǵarylady. Qoimalarda 7 mln astam jup perchatka bar. Aǵymdaǵy jyldyń qarasha aiynda óndiris qýaty táýligine 530 myń jup perchkatkaǵa deiin ulǵaitylady.
Qorǵanysh kostiýmderin shyǵarý
Búginde 6 otandyq kompaniia aiyna 504 myń qorǵanysh kostiýmin shyǵarady. Jyl sońyna deiin olardyń qýaty 1 mln deiin artady.
ÓJJ apparattary boiynsha
«Nur-Sultan qalasynyń meditsinalyq mekemelerine 129 ÓJJ apparaty jetkizildi. Óndiriste jáne stendtik synaqtarda 1190 ÓJJ apparaty bar, olardyń 181 birligi jóneltýge daiyn. Aǵymdaǵy jyldyń 1 qazanynan bastap Almaty jáne Shymkent qalalaryna jetkizý josparlanýda. Qalǵan apparattar 10 qazanǵa deiin Qazaqstannyń 17 óńirindegi 297 aýrýhanaǵa jetkiziledi», — dedi B. Atamqulov.
Jedel járdem kóligi boiynsha
Qazaqstan zaýyttarynda 360 jedel járdem mashinasy shyǵaryldy, onyń 93-i el óńirlerine - Almaty, Nur-Sultan, Soltústik Qazaqstan, Qostanai oblystaryna jetkizildi. Búginnen bastap qalǵan 264 kólikti jetkizý bastalady. Jalpy, osy baǵdarlama aiasynda 5 qarashaǵa deiin 1 167 birlik sanitarlyq kólik jetkiziledi.
Jyljymaly meditsinalyq keshen boiynsha
Búgingi kúni 12 jyljymaly meditsinalyq keshen daiyndaldy. 1 qazannan bastap óńirlerge jetkizý bastalady. 10 birlik kólemindegi alǵashqy partiiasy Qostanai qalasyna barady. Jalpy, óndirýshi osy jyldyń 15 qazanyna deiin barlyq jyljymaly meditsinalyq keshenderdi jetkizýdi qamtamasyz etedi.
53 rentgen apparatyn satyp alý boiynsha
«Jergilikti atqarýshy organdar «Aqtóbrentgen» AQ-men 49 birlik rentgen apparatyn óndirýge kelisimshart jasasty. Sondai-aq, 2 óńirmen taǵy 4 birlikke kelisimshart jasasý jumysy júrgizilýde. Alǵashqy 20 apparat qazan aiynyń basynda Qostanai jáne Aqtóbe qalalaryna jetkiziledi. Qalǵan apparattardy jetkizý aǵymdaǵy jyldyń 30 qazanyna deiin aiaqtalady», — dedi indýstriia jáne infraqurylymdyq damý ministri.
Dári-dármekter boiynsha
Elimizdiń farmatsevtika salasynda 33 kompaniia jylyna 3,9 mlrd dana tabletka men kapsýla kóleminde 922 dárilik preparat shyǵarady. Pandemiianyń ekinshi tolqyny týyndaityn bolsa, farmatsevtika salasynyń kásiporyndary dárilik zattardyń qajetti kólemimen qamtamasyz etýge daiyn.
