«Jalpyǵa mindetti bilim berý» qory aiasynda 300 myńnan astam oqýshy qarjy aldy. Qarjylai kómek 475 myń balaǵa kórsetiledi. Oqý-aǵartý ministri bilim basqarmalarynyń basshylarymen kezdesýde tólemderdi 23 tamyzǵa (qosa alǵanda) deiin aiaqtaý týraly tapsyrma berdi, dep habarlady vedomstvonyń baspasóz qyzmeti.
Biyldan bastap Oqý-aǵartý ministrligi qarjylai kómek kórsetý erejelerine ózgerister engizdi. Eger buryn óńirlerde bólingen soma 17 myńnan 40 myńǵa deiin bolsa, biyl bul soma ulǵaitylyp, keminde 37 389 teńgeni quraidy.
Kómek berý tetigine de ózgerister engizilgen. Endi ata-analarǵa qarjy balalarymen birge mektep formasyn, aiaq kiimin, keńse taýarlaryn jáne t.b. óz betinshe tańdai alýy úshin banktegi shotyna aýdarylady. Buǵan deiin munyń barlyǵyn ákimdikter satyp alatyn jáne taýardyń ólshemine, sapasyna, t.b. qatysty máseleler týyndaityn.
«Endi ata-analar ózderiniń banktegi shotyna aqshany tikelei alyp, balalaryna mektep formasyn, keńse taýarlaryn jáne aiaq kiimin óz betinshe tańdai alady. Munyń artyqshylyǵy - bala ata-anasymen birge tańdaǵan kiimmen mektepke bara alýynda. Buǵan deiin satyp alýmen ákimdikterdiń qyzmetkerleri ainalysatyn. Keide kiimniń ólshemine, sapasyna qatysty problemalar týyndaityn. Qazir ákimdikter qarajat aýdarýdy aiaqtap jatyr. 37 389 teńge – eń tómengi soma. Jergilikti atqarýshy organdar kórsetilgen kómek kólemin kóbeite alady, biraq ony azaitýǵa quqyǵy joq. Keibir ákimdikter bul somadan artyq qarjy bólip jatyr, mysaly, Almaty 43 myń teńgeden. Biz muny tek qup kóremiz», - dedi Oqý-aǵartý ministrligi Balalardyń quqyqtaryn qorǵaý komiteti tóraǵasynyń orynbasary Dýlat Jekebaev.
«Jalpyǵa mindetti bilim berý» qorynan ataýly áleýmettik kómek alatyn otbasylardyń balalaryna, sondai-aq AÁK almaityn, biraq jan basyna shaqqandaǵy ortasha tabysy eń tómengi kúnkóris deńgeiinen tómen otbasylardyń balalaryna, jetim balalarǵa jáne ata-anasynyń qamqorlyǵynsyz qalǵan balalar, tótenshe jaǵdaiǵa tap bolǵan oqýshylar jáne t.b. kómek kórsetiletinin eske sala keteiik.
