Jýrnalist Rýslan Ótepbai Aqtóbe oblysynda ornalasqan, Rahat Sársenov 30 jylǵa jýyq eńbek etken qojalyqqa baryp, oqiǵanyń mán-jaiyn zerttedi, dep habarlaidy ult.kz.
Rahat Sársenovtiń aitýynsha, ol atalǵan qojalyqqa 1994 jyly jylqyshy bolyp jumysqa ornalasqan. Osy ýaqyt ishinde aýyr eńbek jaǵdaiynda qyzmet atqaryp, túrli jaraqat alǵanyn aitady. Onyń sózinshe, jumys barysynda bas barmaǵynan aiyrylyp, qabyrǵasy synyp, densaýlyǵyna eleýli ziian kelgen. Soǵan qaramastan, «qojalyqqa da, Tájiǵaliǵa da adal qyzmet ettim» deidi.
Buǵan deiin Rahat Sársenov óziniń negizsiz aiyp taǵylǵanyn, qamaýda bolǵanyn jáne qazirgi tańda jalǵyz baspanasynan aiyrylyp qalý qaýpi tónip turǵanyn málimdegen edi. Onyń sózinshe, bul jaǵdai burynǵy jumys berýshisi Tájiǵali Esenovpen aradaǵy daýdan keiin týyndaǵan.
Jýrnalist Tájiǵali Esenovtiń de ustanymyn bilý úshin ózimen birneshe márte habarlasýǵa áreket jasaǵanyn, alaida ázirge jaýap ala almaǵanyn aitty. Sonymen qatar, eger ol pikir bildirýge niet tanytsa, onyń ýáji de tolyq kólemde jariialanatynyn jetkizdi.
BUǴAN DEIIN NE BOLDY?
Rahat Sársenov buǵan deiin ózine taǵylǵan aiyp boiynsha sot sheshimimen 7 jylǵa bas bostandyǵynan aiyrylǵan. Alaida keiinirek apelliatsiialyq saty isti qaita qarap, jaza merzimin qysqartqan. Onyń aitýynsha, ol túzeý mekemesinde eki ai eki kún bolyp, keiin bostandyqqa shyqqan.
Rahat Sársenov ózine taǵylǵan aiyppen kelispeitinin aityp, istiń ádil tergelmegenin alǵa tartady. Al quqyq qorǵaý organdary men sot qabyldaǵan sheshimder zań aiasynda júzege asyrylǵanyn málimdegen.
Qazirgi ýaqytta Rahat Sársenov burynǵy jumys berýshisimen aradaǵy azamattyq-quqyqtyq daýǵa bailanysty jalǵyz baspanasynan aiyrylyp qalý qaýpine tap bolǵanyn aityp otyr. Bul máselege qatysty túpkilikti quqyqtyq baǵany sot pen ýákiletti organdar beredi.
