Áleýmettik jeli qoldanýshylary eski "Zaporojets" kóligimen jol apatyna ushyraǵan pavlodarlyq zeinetkerge kómektesý úshin úsh saǵatta eki million teńgege jýyq qarajat jinady, - dep habarlaidy Tengrinews.kz agenttigi.
Instagram jelisindegi málimet boiynsha, pavlodarlyq qariianyń jeke esepshotyna jetkilikti qarajat túsken. Biraq qariia jinalǵan aqshanyń naqty kólemin jariialamaýdy jón kórgen.
Alǵashqy bolyp qarjy jinaýdy Ekibastuz qalasynyń turǵyny Dinara Moldanazarova uiymdastyrǵan. Qariiaǵa bank kartasyn ashýǵa kómekteskennen keiin ol aqsha jinaýdy toqtatqan. Biraq qazaqstandyqtar 85 jastaǵy Efim Nikitichtiń esepshotyna aqsha aýdarýdy toqtatpaǵan. Bir kúnnen keiin zeinetker Instagram jelisinde oǵan janashyrlyq tanytyp, kómek kórsetkenderdiń bárine alǵysyn bildirdi.
"Qazir qajetti somany jinadyq, aqsha jiberýdi toqtatýdy suraimyn. Saý bolyńyzdar, bárine baqyt tileimin", - deidi qariia.
Video syrtynda er adam jinalǵan qarajat jetkilikti ekenin aitady.
"Bir kúnde óte jaqsy somany jinadyq. Onyń ústine, Efim Nikitichte jańa kólik alýǵa da aqsha qalady", - dedi er adam.
Qariia jol apatyna ózin kináli sanaidy. Osyǵan qaramastan, áleýmettik jeli qoldanýshylary sheteldik kólik júrgizýshisine qart adamǵa meiirimdilik tanytyp, kólikti jóndeýdi talap etpeýdi ótindi. Degenmen, jóndeý úshin aqsha tóleýge týra keledi.
"Atanyń saqtandyrýy joq, onyń ústine, Toyota kóligin iesiniń ózi emes, júrgizýshi tizgindegen. Qatelik atadan ketken. Sheteldik kólik qatty zaqymdalǵan. Sondyqtan qalpyna keltirý úshin aqsha tóleýge týra keledi. Qazir shyǵyn eseptelip jatyr, somasy belgili bolǵannan keiin jinalǵan aqshany tehnikalyq qyzmet kórsetý stantsiiasyna aýdaramyn", - dedi Moldanazarova.
Eriktilerdiń aitýynsha, Efim Nikitichtiń eski kóligin qalpyna keltirý múmkin emes. Biraq bul endi mańyzdy emes. Asylbek Andabaev esimdi er adam "Zaporojets" kóligin zeinetkerge berýge daiyn. Er adam tis dárigeri bolyp jumys isteitinin, qazir Reseide bilim alyp jatqanyn aitty. Ol aptanyń aiaǵyna deiin oralyp, kólikti pavlodarlyq qariiaǵa syilaýǵa ýáde bergen.
Eske salaiyq, buzylǵan "Zaporojets" kóligi janynda muńaiyp turǵan zeinetkerdiń videosy áleýmettik jeli qoldanýshylaryn eljiretken bolatyn. Jeli qoldanýshylary eski kólikti jóndeý nemese jańasyn satyp alý úshin aqsha jinaýǵa kirisken.
