Úkimet Jetisý oblysyndaǵy Alakól kóliniń jaǵalaýyn shaiylýdan qorǵaýǵa arnalǵan bóget qurylysyna 3 mlrd teńge bóldi. Qarjy Memleket basshysynyń sý sharýashylyǵy infraqurylymyn damytý jónindegi tapsyrmalaryn oryndaý aiasynda Úkimet rezervinen qarastyryldy, dep habarlaidy ult.kz.
Tiisti qaýlyǵa Premer-ministr Oljas Bektenov qol qoidy.
Bólingen qarajattyń esebinen uzyndyǵy 6 shaqyrym bolatyn qorǵanys bógeti salynady. Onyń 2,5 shaqyrymy Kóktuma aýylynda, al 3,5 shaqyrymy Aqshi aýylynda ornalasady.
Joba buǵan deiin de kezeń-kezeńimen iske asyryla bastaǵan. 2025 jyly uzyndyǵy 1,7 shaqyrym ýchaskede jaǵalaýdy nyǵaitý, jer qazý, beton quiý jáne gabion qurylymdaryn ornatý jumystary aiaqtalǵan. Qazirgi tańda qurylys-montaj jumystarynyń shamamen 25 paiyzy oryndalǵan.
Jobany tolyq iske asyrý Alakól jaǵalaýynyń odan ári shaiylýyn toqtatýǵa, kóldegi shógindilerdiń tabiǵi qozǵalysy men qaita bóliný protsesin saqtaýǵa múmkindik beredi.
Sonymen qatar qorǵanys infraqurylymy óńirdiń týristik áleýetin arttyryp, demalýshylar men jergilikti turǵyndar úshin qaýipsiz ári qolaily jaǵdai qalyptastyrýǵa yqpal etedi.
Úkimettiń málimetinshe, sońǵy eki jylda Aqmola, Aqtóbe, Batys Qazaqstan, Qostanai, Soltústik Qazaqstan jáne Pavlodar oblystarynda jalpy uzyndyǵy 243 shaqyrym bolatyn qorǵanys bógetteri men gidrotehnikalyq qurylystar salynyp, nyǵaitylǵan.
Úkimet sý jáne týristik infraqurylymdy damytýǵa, tabiǵi resýrstardy saqtaýǵa jáne óńirlerdiń ornyqty áleýmettik-ekonomikalyq damýyna baǵyttalǵan jobalardy turaqty baqylaýda ustap otyrǵanyn málimdedi.
Eske salaiyq, buǵan deiin Alakól men Qapshaǵaidaǵy qaýipsizdikti jasandy intellekt júiesi baqylaityny habarlanǵan bolatyn.
