Atyraý oblysynda bekire tuqymdas balyqty zańsyz aýlaǵan brakonerler ustaldy. Bul jaiynda QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet Facebook-tegi paraqshasynda jazdy, dep habarlaidy "Ult aqparat".
Onyń atap ótýinshe, 2019 jylǵy 5 qyrkúiek kúni Atyraý oblystyq orman sharýashylyǵy jáne janýarlar dúniesi aýmaqtyq inspektsiiasynyń qyzmetkerleri Kaspii teńiziniń Soltústik bóligine sholǵyndaý sharasyn júrgizgen. Shamamen saǵat 12-30-da inspektsiia qyzmetkerleri 200 attyń kúshi bar aspaly «Iamaha», motorly «Baida» qaiyǵyn mingen Atyraý qalasynyń 2 turǵynyn qolǵa túsirgen.
«Júzý quralyn tekserý barysynda jalpy salmaǵy 264 keli bolatyn bekire tuqymdas 92 balyq, jalpy salmaǵy 34 keli bolatyn 39 dana bekire tuqymdas balyqtyń basy, salmaǵy 22 keli tartatyn 2 sazan, sonymen qatar uzyndyǵy shamamen 300 metr bolatyn aý men «Garmin» spýtniktik navigatsiiasy quraly tabylyp, tárkilendi. Tárkilengen balyq Jaiyq-Atyraý bekire balyǵy sharýashylyǵy zaýytyna tapsyrylyp, al «Baida» qaiyǵy Atyraý qalalyq politsiia basqarmasyn ýaqytsha saqtaýǵa jetkizildi. Atalǵan fakti boiynsha oqiǵa ornynan Atyraý qalalyq PB jedel tergeý toby shaqyryldy. Jinalǵan material QR QK 335 baby boiynsha qylmystyq is qozǵaý úshin politsiia qyzmetkerlerine tapsyryldy», - dedi S.Dildahmet.
