2500 orynǵa arnalǵan mekteptiń úlgilik jobasy ázirlenip jatyr. Bul týraly Úkimet basshysynyń birinshi orynbasary Álihan Smaiylov aitty, dep habarlaidy QazAqparat.
«Ministrlik (Bilim jáne ǵylym ministrligi) 2018 jyly orta bilim berý nysandaryn jobalaý kezinde qurylys normalaryn qaita qaraý jumysyn bastady. Osy kezeńde múddeli memlekettik organdardyń qatysýymen 3000 oqýshyǵa arnalǵan mektep salý, 5 qabatty mektep ǵimarattaryn salý, jer ýchaskeleriniń alańy boiynsha talaptardy qaita qaraý jáne basqa da máseleler pysyqtaldy», - delingen Smaiylovtyń depýtattyq saýalǵa bergen jaýabynda.
Onyń aitýynsha, biyl qurylys normalaryna ózgerister engizý boiynsha qosymsha usynystar tizbesi qalyptastyryldy (ǵimarattardyń alańy, oqý jabdyǵymen jaraqtandyrý, oqý kabinetteri boiynsha).
«Sonymen qatar, qazirgi kezde Indýstriia jáne infraqurylymdyq damý ministrliginiń Qurylys jáne turǵyn úi-kommýnaldyq sharýashylyq isteri komiteti 2500 orynǵa arnalǵan mekteptiń úlgilik jobasyn ázirleýde. Jalpy, atalǵan baǵyttardaǵy jumys jalǵasýda jáne Úkimettiń turaqty baqylaýynda», - dedi Smaiylov.
Aita keteiik, Álihan Smaiylov elimizde salynatyn jańa mektepterge qatysty túsinik berdi. 1000 mekteptiń qurylysy boiynsha problemalyq máselelerge qatysty sizderdiń depýtattyq saýaldaryńyzǵa mynany habarlaimyn. Qazirgi kezde Memleket basshysynyń tapsyrmasyna sáikes 2025 jyldyń sońyna deiin keminde 1000 mektep salý boiynsha óńirler bólinisinde jol kartasy ázirlenýde. 2021 jyly 1000 mekteptiń 200-in, onyń ishinde nysanaly qurylys esebinen 163 mektepti, jan basyna qarjylandyrý tetigi esebinen 31 jekemenshik mektepti, memlekettik-jekeshelik áriptestik (MJÁ) aiasynda 6 mektepti paidalanýǵa berý josparlanǵan.
Eske sala keteiik, biyl qazan aiynda Parlament Májilisiniń jalpy otyrysynda depýtat Juldyz Súleimenova jańa mektepter qurylysyna kedergi bolatyn túiindi máselelerdi kóterdi.
Osy oraida depýtat QR Premer-Ministriniń birinshi orynbasary Álihan Smaiylovtyń atyna saýal joldady.
