Qostanai oblysynda meditsina qyzmetkerlerin, muǵalimder men politseilerdi vaktsinalaý jalǵasýda. Politseiler arasynda 800-ge jýyq ishki ister organdarynyń qyzmetkerleri koronavirýsqa qarsy vaktsina aldy, dep habarlaidy "Ult aqparat".
Qostanai oblysy Politsiia departamenti meditsina bóliminiń basshysy Qairat Nurtazenov atap ótkendei, vedomstvonyń 2511 qyzmetkerin vaktsinalaý josparlanyp otyr.
«Ishki ister organdarynyń qyzmetkerlerin vaktsinalaý bastaldy. Oblystyq densaýlyq saqtaý basqarmasymen birlesip vaktsinatsiiadan ótý grafigi ázirlendi. 2511 qyzmetker vaktsina alýy tiis. Búgingi kúnde 784 qyzmetker ekpe saldyrdy», - dep habarlady ol.
Oblystyń PD esirtki qylmysymen kúres jónindegi qyzmetker Lev Kvasenko vaktsina alǵannan keiingi jaǵdaiy týraly aitty.
«Naýryz aiynyń basynda vaktsinatsiianyń birinshi kezeńinen óttim. Ekinshisin naýryzdyń sońynda aldym. Alǵashqy belgiler baiqaldy, dene qyzýym azdap kóterildi, bulshyq etterim men býyndarym aýyrdy. Bul – qalypty jaǵdai. Óitkeni onyń ekpe ekenin jáne onyń aǵzaǵa áser etetinin túsiný qajet»,- dep atap ótti ol.
Politsiia departamenti qyzmetkeriniń aitýynsha, ekpe sanaly túrde jasalǵan.
«Qoǵamda jalǵyz turmaitynyńdy túsiný qajet. Seniń balalaryń bar, dúkenge barasyń, qoǵamdyq kólikke minesiń, kóptegen adammen kezdesesiń. Sondyqtan ekpe aldyrý – bul qajettilik», - dep túiindedi Lev Kvasenko.
