Foto: Akorda.kz
Prezident Qorǵanys ministri Rýslan Jaqsylyqovty qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysyna qorǵanys vedomstvosynyń biylǵy birinshi jartyjyldyqta atqarǵan jumystarynyń qorytyndysy jóninde baiandaldy.
Prezident – Qarýly Kúshterdiń Joǵarǵy Bas qolbasshysy kezeńdik ózgeristerge negizdelgen jaýyngerlik daiarlyqtyń jańa formatyn jáne komandirlerdiń basqarý qabiletin jetildirý modelin engizý jaiynda esepti tyńdady.
Sonymen qatar Rýslan Jaqsylyqov Qasym-Jomart Toqaevqa territoriialyq qorǵanysty nyǵaitýǵa qatysty qabyldanyp jatqan sharalar týraly baiandady. Bul baǵyttaǵy jumystar zańnamalyq jáne praktikalyq deńgeide júrgizilip jatyr.
Prezidentke árdaiym jaýyngerlik daiyndyqta bolatyn bólimderdi qarý-jaraqpen jáne áskeri tehnikamen jabdyqtaý barysy, sondai-aq otandyq óndiristiń mobildi jáne modýldik komponentterge kóshirilýi týraly málimet berildi.
Memleket basshysyna Qarýly Kúshterdiń bitimgerlik qyzmeti týraly arnaiy baiandaldy.
Kezdesýde áskerge shaqyrylatyn jáne merzimdi qyzmetin ótegen azamattar týraly málimetterdi tsifrlyq júiege kóshirý sharalary jóninde de aityldy. Aqparattyq júielerdiń jańǵyrtylyp, olardyń basqa memlekettik organdardyń derekqorlarymen biriktirilýi tirkeý, áskeri esepke qoiý jáne áskeri biletterdi berý qyzmetterin elektrondy formatqa aýystyrýǵa múmkindik berdi.
Budan bólek, Rýslan Jaqsylyqov áskerge shaqyrylatyn azamattarǵa kredittik demalys berý, sondai-aq bilim alýǵa jeńildikter jasaý úshin qabyldanyp jatqan sharalar týraly aitty. Búginde 2,5 myń sarbazdyń nesiesi keiinge shegerildi jáne áskeri qyzmetin ótegen 1,5 myń jaýyngerge joǵary oqý oryndarynda oqýǵa oryn bólindi.
Jyl basynan beri merzimdi áskeri qyzmetin ótep, zapasqa shyǵarylǵan 700-ge jýyq sarbaz júrgizýshi, mehanik, mashinist, slesar, aspaz jáne basqa da eńbek naryǵynda suranysqa ie mamandyqtar boiynsha bilim aldy.
Prezident atalǵan bastamalardy, atap aitqanda Joǵary bilim jáne ǵylym ministrligimen birlesip, bilim alýǵa jeńildik beretin kvotalar bólý, merzimdi áskeri qyzmetin ótegenderge memlekettik bilim granttaryn usyný, sondai-aq olardyń zańnamalyq turǵyda bekitilýin jalǵastyrý máselesin nazarǵa aldy.
Kezdesý sońynda Qasym-Jomart Toqaev Qarýly Kúshterdiń jaýyngerlik daiyndyǵyn kúsheitý máselesine basa mán bere otyryp, birqatar tapsyrma berdi.
