Vetnam Sotsialistik Respýblikasynan Qazaqstan Respýblikasy Ádilet ministrliginiń «Sot saraptamalary ortalyǵy» RMK qyzmetinde memlekettik satyp alýlar kezinde 2,5 mlrd teńge kólemindegi biýdjet qarajatyn jymqyrdy degen kúdikke ilingen azamat Qazaqstanǵa jetkizildi, dep habarlaidy ult.kz.
Tergeý málimetinshe, 2023–2025 jyldarǵa arnalǵan Esirtkige qarsy is-qimyl jáne esirtki biznesine qarsy kúres jónindegi keshendi jospar aiasynda sot saraptamasy organdarynyń materialdyq-tehnikalyq bazasyn jańartýǵa respýblikalyq biýdjetten 10 mlrd teńgeden astam qarjy bólingen.
Qarjylyq monitoring agenttiginiń habarlaýynsha, kúdikti ortalyqtyń burynǵy direktory Satybaldiev R.K., Memlekettik satyp alý departamentiniń basshysy Iskenderova D.B. jáne «Mark Invest» JShS men «Direct Services» JShS basshysy Shintemirova A.A.-men aldyn ala sóz bailasyp, satyp alynatyn jabdyqtardyń baǵasyn úsh esege deiin negizsiz kóterip, jalǵan kommertsiialyq usynystardy paidalaný arqyly biýdjet qarajatyn jymqyrý shemasyn uiymdastyrǵan.
Sot úkimimen Satybaldiev R.K., Iskenderova D.B. jáne Shintemirova A.A. kináli dep tanylyp, olardyń múlki tárkilendi. Sondai-aq árqaisysyna 3 jyldan 8 jylǵa deiin bas bostandyǵynan aiyrý jazasy taǵaiyndalǵan.
Isti uiymdastyrdy degen kúdikti 2025 jylǵy naýryzda halyqaralyq izdeýge jariialanyp, sottyń sanktsiiasymen syrttai qamaýǵa alý túrindegi bultartpaý sharasy qoldanylǵan. Biyl ol Vetnam aýmaǵynda ustaldy.
Qarjylyq monitoring agenttigi, Interpoldyń Ulttyq ortalyq biýrosy jáne Qazaqstannyń Syrtqy ister ministrligi júrgizgen birlesken jumystardyń nátijesinde kúdikti Qazaqstanǵa ekstraditsiialandy.
Qazirgi ýaqytta qylmystyq is sotqa joldanǵan. QR Qylmystyq-protsestik kodeksiniń 201-babyna sáikes tergeýge qatysty ózge málimetter jariia etilmeidi.
Eske salaiyq, buǵan deiin Qazaqstanǵa World Business Consulting qarjy piramidasy isi boiynsha kúdikti de ekstraditsiialanǵan bolatyn.
