Almaty oblysynda útikpen azaptaý isi boiynsha 25 adam jábirlenýshi retinde tanyldy. Prokýratýra bul iske bes politseidiń qatysy baryn anyqtady, - dep habarlaidy Tengrinews.kz.
Bas prokýratýranyń qylmystyq qýdalaý qyzmetiniń bastyǵy Serik Shalabaev OKQ brifinginde tergeýdiń ruqsat etilmegen ádisteri derekterin tergeý týraly aitqan.
"Qazir eń daýly 8 jaǵdaidy arnaiy prokýrorlar tergep jatyr. Osy ister boiynsha arnaiy jáne quqyq qorǵaý organdarynyń 15 qyzmetkeri kúdikti dep tanyldy, olardyń 9-y qamaýda otyr.
Sonyń ishinde Almaty oblysynda qyzdyrylǵan útik býyn paidalanyp azaptaý ici boiynsha 25 adam jábirlenýshi bolyp tanyldy. Jedel-tergeý áreketteriniń nátijesinde arnaiy prokýrorlar bes politseidiń qatysy baryn anyqtady. Olardyń úsheýi kinásin moiyndady", - dedi Shalabaev.
Onyń aitýynsha, Almaty oblysy Ulttyq qaýipsizdik komiteti departamentiniń eki qyzmetkerine qatysty tergeý amaldary aiaqtaldy. Olar ustalǵan adamdy uryp-soǵyp, onyń ólimine sebep boldy degen kúdikke ilingen.
Shalabaev azaptaý boiynsha qylmystyq is tergeýdiń ereksheligimen sipattalatynyn atap ótti.
"Jábirlenýshilerdiń kópshiligi bul oqiǵaǵa qatysy bar adamdardy anyqtai almaidy, óitkeni keibireýi betperde taqqan nemese arnaiy kiimsiz bolǵan. Is boiynsha eshqandai beinematerialdar joq, óitkeni politsiia ǵimarattaryna shabýyl jasaý nátijesinde qurylǵy búlingen. Osyǵan qaramastan, dáleldemeler jinaý boiynsha tergeý jáne is júrgizý áreketteriniń barlyq kesheni júrgiziledi", - dedi ol.
