«Qazgidromet» RMK elimizdiń kóptegen óńirine 23 maýsymǵa arnalǵan daýyldy eskertý jariialady. Sinoptikterdiń málimetinshe, birqatar oblystarda aýa temperatýrasy 40-41 gradýsqa deiin kóterilip, naizaǵai, burshaq, daýyl jáne shańdy daýyl kútiledi, dep habarlaidy ult.kz.
Eń joǵary temperatýra Almaty oblysynyń soltústiginde, Pavlodar, Qaraǵandy jáne Túrkistan oblystarynyń jekelegen aýdandarynda tirkelmek. Bul óńirlerde kúndiz aýa temperatýrasy 40-41 gradýsqa deiin jetedi dep boljanyp otyr.
Elordada 23 maýsym kúni kúndiz shańdy daýyl soǵyp, jeldiń ekpini sekýndyna 15-20 metrge deiin kúsheiedi. Aýa temperatýrasy 35-37 gradýsqa deiin kóterilip, joǵary órt qaýpi saqtalady.
Almatyda kúndiz 35 gradýsqa deiin ystyq bolady. Qala aýmaǵynda joǵary órt qaýpi saqtalady. Al Shymkentte soltústik-batystan soǵatyn jeldiń ekpini 15-20 metrge deiin jetedi.
Soltústik óńirlerde aýa raiy qubylmaly bolady. Aqmola, Soltústik Qazaqstan jáne Qostanai oblystarynda jańbyr jaýyp, naizaǵai oinaidy. Kei jerlerde qatty jańbyr, burshaq jáne daýyl kútiledi. Jeldiń ekpini 23-28 metrge deiin kúsheiýi múmkin.
Qaraǵandy, Ulytaý, Aqtóbe, Qyzylorda, Batys Qazaqstan, Atyraý jáne Mańǵystaý oblystarynda da naizaǵaily jańbyr, daýyl jáne kei óńirlerde shańdy daýyl boljanǵan. Sonymen qatar Qyzylorda men Mańǵystaýda jeldiń kúsheiýi jáne shańdy daýyl turǵyndarǵa qolaisyzdyq týdyrýy múmkin.
Shyǵys Qazaqstan men Abai oblystarynda jeldiń ekpini 25 metrge deiin jetip, ótkinshi jańbyr men naizaǵai kútiledi. Jetisý oblysynda Alakól kólderi aýdanynda jeldiń jyldamdyǵy kei ýaqytta 23-28 metrge deiin kúsheimek.
Sinoptikterdiń málimetinshe, aptap ystyqtyń áserinen Almaty, Jetisý, Shyǵys Qazaqstan, Abai, Pavlodar, Qaraǵandy, Aqmola jáne basqa da birqatar óńirde joǵary jáne tótenshe órt qaýpi saqtalady. Mamandar turǵyndardy qaýipsizdik sharalaryn saqtaýǵa, ashyq ot jaqpaýǵa jáne aýa raiy boljamdaryn qadaǵalap otyrýǵa shaqyrdy.
