Foto: ashyq derekkóz
Prezidenttiń memlekettik qarjynyń uzaqmerzimdi teńgerimdiligin qamtamasyz etý jónindegi tapsyrmalaryn oryndaý sheńberinde Úkimet otyrysynda eldiń 2026-2035 jyldarǵa arnalǵan uzaqmerzimdi damý boljamy qaraldy, dep habarlaidy Ult.kz.
Qujattyń negizgi parametrleri týraly Premer-ministrdiń orynbasary – ulttyq ekonomika ministri Serik Jumanǵarin baiandady.
Onyń aitýynsha, damýdyń úsh nusqasy qarastyryldy: negizgi, qalypty jáne balama. Bazalyq nusqada 10 jyl ishinde JIÓ-niń ortasha jyldyq ósimi 4,5%-dy quraidy, bul 2035 jylǵa qarai nominaldy JIÓ-di 473,2 trln teńgege deiin ulǵaitýǵa múmkindik beredi.
Boljamǵa sáikes, memlekettik biýdjettiń kirisi 2035 jyly 66,8 trln teńgege deiin ulǵaiady. Bul rette shikizat sektoryna táýeldilikti tómendetý úshin Ulttyq qordan kepildendirilgen transferttiń mólsheri 2029 jyldan bastap birtindep 2,0 trln teńgege deiin tómendetiledi.
«2035 jyly memlekettik biýdjettiń kirisi 66,8 trln teńgege deiin ulǵaiady. Kepildendirilgen transfert 2029 jyldan bastap 2 trln teńgege deiin tómendetýmen kózdelgen. Biýdjet tapshylyǵy 2029 jyly JIÓ-niń 0,4%-ǵa deiin birtindep tómendeýmen jáne 2030 jyldan bastap nóldik deńgeige jetýmen aiqyndaldy», — dep atap ótti vitse-premer.
