2030 jylǵa qarai Qazaqstanda munai óndirý 100 mln tonnadan asa túspek. Bul týraly QR Energetika ministri Maǵzum Myrzaǵaliev málim etti, dep habarlaidy QazAqparat.
«Biylǵy jyldyń qorytyndysy boiynsha elimizde munai óndirý kólemi 85,7 mln tonnaǵa jetip otyr, al eksporttaý 67,6 mln tonna kóleminde dep kútilýde. Josparǵa sáikes elimizde munai óndirý odan ári ulǵaiatyn bolady. 2030 jylǵa qarai onyń kólemi 104,2 mln tonnaǵa deiin jetedi», - dedi M. Myrzaǵaliev Úkimet otyrysynda jasaǵan baiandamasynda.
Sondai-aq, ministr munai óndirý boiynsha aldaǵy josparmen bólisti.
«Birinshiden, Teńiz ken orny arqyly munai óndirý jylyna 12 mln tonnaǵa artady (qazirgi óndirý 28 mln tonna). Ekinshiden, Qarashyǵanaq ken ornyndaǵy óndirý deńgeiin uzartý jobasynyń arqasynda munai óndirý jylyna 11-12 mln tonna deńgeiinde saqtalmaq. Kelesi jospar Qashaǵan ken ornynda gaz óńdeý zaýytyn salý. Atalǵan ónerkásip jylyna 3 mlrd tekshe metr taýarlyq gaz óndirýge jáne munai óndirýdi 16-dan 20 mln tonnaǵa deiin ulǵaitýǵa múmkindik beredi. Tórtinshiden, Kaspii teńizindegi Hazar jáne Qalamqas-teńiz ken oryndaryn igerý jobasy boiynsha jumystar bastaldy. Bul ken oryndarynda 2028 jyldan bastap jylyna 4 mln tonna munai óndiriledi dep josparlanyp otyr», - deidi ol.
