«Nurly Ertis» pilottyq jobasyn iske asyrý aiasynda Pavlodar oblysyna erikti túrde qonys aýdarý boiynsha 2019 jyldyń mamyrynan beri el astanasynan Ekibastuzǵa 203 otbasy nemese 1 myń 169 adam kóshti. Bul jóninde Eńbek jáne halyqty áleýmetitk qoldaý ministrliginiń baspasóz qyzmeti habarlady.
Jumys kúshi artyq óńirlerdiń tizimin biylǵy mamyr aiynda Nur-Sultan qalasy tolyqtyrdy. Kenshiler qalasyna kóshýdi sheshken elorda turǵyndary úshin Ekibastuzda ómir súrýge barlyq jaǵdai jasalǵan. Qonys aýdarýshylardy turǵyn úimen, jumyspen qamtamasyz etedi, al qajet bolǵan jaǵdaida oqýǵa jiberedi.
Ekibastuzǵa alǵashqylardyń biri bolyp kópbalaly Shapaǵat pen Saltanat Malikovtar kóship keldi.
«Osy jyldyń mamyr aiynda «Nurly Ertis» jobasynyń qatysýshylary retinde biz elordadan Ekibastuzǵa kóship kettik. Kelgennen keiin bizge jaldamaly turǵyn úi - 3 bólmeli páter berildi. Joldasymdy «Optima Trans» JShS-de avtomehanik retinde jumysqa ornalastyrdy. Bizdiń tórt balamyz bar. Eki kishkentaiymyz - egizder, 2 jasta. Úlkenderimiz ekinshi jáne altynshy synyptarda oqidy. Balabaqsha, mektepte tamaqtaný jáne balalarǵa arnalǵan qoǵamdyq kólikter - barlyǵy tegin. Otbasymyzdyń ómiri jaqsardy dep senimmen aita alamyn», – dep Saltanat Malikova óz qýanyshymen bólisti.
Elordadan Ekibastuzǵa kóshken 203 otbasynyń 122-si - 3 bólmeli páterge, 69 otbasy - 2 bólmeli páterge jáne 12 otbasy - 1 bólmeli páterge jaiǵasty.
«Nurly-Ertis» jobasy nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aiasynda júzege asyrylýda. Azamattardy jumys kúshi artyq óńirlerden jumys kúshi tapshy óńirlerge qonys aýdarý osy memlekettik baǵdarlamanyń mańyzdy baǵyttarynyń biri bolyp tabylady jáne kelesi mehanizmderdi kózdeidi:
- kóshýge 35 AEK nemese otbasynyń árbir múshesine 88 myń teńge mólsherinde ai saiynǵy sýbsidiia tóleý;
- qalalyq aýdandarda turǵyn úidi jalǵa alýǵa ai saiynǵy shyǵystardy 75 myń teńgege deiin (30 AEK) jáne aýyldyq jerlerde otbasy músheleriniń sanyna bailanysty 53 myń teńgege deiin (21 AEK) óteý;
- jumys berýshilerge keminde 5 adamnyń jumysqa ornalasýyna yqpal jasaǵan jaǵdaida, 450 AEK nemese 1 mln 136 myń teńge kóleminde sýbsidiia beriledi;
- qajetti jumys quraldaryn, tehnologiialyq jabdyqtardy, úi janýarlary men qustaryn satyp alý, jańa biznes-ideialardy iske asyrý úshin memlekettik baǵdarlamanyń qatysýshylaryna 200 AEK-ke deiin qarajat bólinedi;
- qonys aýdarýshylar tehnikalyq jáne kásiptik bilim alýǵa, qysqa merzimdi kýrstarǵa qol jetkize alady, sondai-aq olarǵa jumysqa ornalasýǵa járdem kórsetedi.
«Erikti qonys aýdarýdyń maqsaty - eńbek kúshi tapshy óńirlerdi jumys kúshimen qamtamasyz etý jáne óńirlik sáikessizdikter men demografiialyq teńgerimsizdikti joiý. Erikti túrde qonys aýdarýǵa Almaty, Túrkistan, Jambyl, Qyzylorda, Mańǵystaý oblystarynyń jáne Shymkent jáne Nur-Sultan qalalarynyń turǵyndary qatysa alady. Búgingi kúni qonys aýdarýshylardy qabyldaý úshin tórt óńir bekitildi: SQO, ShQO, Pavlodar jáne Qostanai oblystary», – dep habarlady minimtrliktiń halyqty jumyspen qamtý departamentiniń basqarma basshysy Aijan Japalbaeva.
2019 jyldyń 8 aiynda «Eńbek» memlekettik baǵdarlamasyn iske asyrý sheńberinde eńbek kúshi tapshy óńirlerden 1 myń 650 otbasy nemese 5 myń 918 adam kóship keldi.
