2025 jylǵa qarai Qazaqstanda halyqtyń ómir súrý uzaqtyǵy 75 jasqa jetedi. Bul týraly búgin Úkimet otyrysynda QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Baǵdarlamany júzege asyrýǵa 3 trillion 180 mlrd teńge bólý qarastyrylǵan. Elbasy tapsyrmasyn oryndaý barysynda densaýlyq saqtaý shyǵyndarynyń úlesi jalpy ishki ónimniń 5 paiyzyna jetkiziledi. Ol úshin alty jylda densaýlyq salasyna barlyq kózderden jalpy 25,8 trillion teńge jumsalady», -dedi 2020-2025 jyldarǵa arnalǵan densaýlyq saqtaýdy damytý memlekettik baǵdarlamasynyń jobasyn tanystyrǵan ministr.
Onyń atap ótýinshe, densaýlyq salasyndaǵy jalpy shyǵyndar ishinde investitsiialar kólemi 2,8 trillion teńgeni quraidy. Jeke investitsiialar úlesi ortasha 70 paiyzǵa ósedi. Investitsiialardyń 43 paiyzy iri memlekettik-jekeshelik áriptestik jobalarǵa jumsalady.
«Baǵdarlamany oryndaý arqyly bir adamnyń densaýlyǵyna shaqqanda shyǵyndar 279 myń teńgege jetedi. Densaýlyq saqtaý infraqurylymy jańarady, jáne kelesi tórt maqsatty indikatorǵa qol jetkiziledi. Negizgi sozylmaly aýrýlardan erte ólim qaýpi 20 paiyzǵa, ana ólimi 17 paiyzǵa, náreste ólimi 19 paiyzǵa tómendeidi. Halyqtyń ómir súrý uzaqtyǵy 75 jasqa jetedi. Baǵdarlama jobasy halyqpen, memlekettik emes jáne halyqaralyq uiymdarmen, barlyq memlekettik organdarmen, Prezident Ákimshiligimen kelisilgen», - dedi Eljan Birtanov.
