2025 jylǵa qarai elimizde 50 jańa aýrýhana salynady. Bul týraly búgin QR Densaýlyq saqtaý ministrliginiń keńeitilgen alqa otyrysynda vedomstvo basshysy Aleksei Tsoi aitty, dep habarlaidy "Ult aqparat".
«Meditsinalyq kómektiń qoljetimdiligin ásirese aýyldyq jerge qamtamasyz etý úshin kelesi is-sharalar qabyldanatyn bolady. Alǵashqy medtsinalyq-sanitarlyq kómektiń attam jerde qoljetimdiligin qamtamasyz etý úshin 2025 jylǵa deiin AMSK-niń 487 nysany, onyń ishinde aýyldyq eldi mekenderde 137 nysany salynady», - dedi ol.
Ministrdiń atap ótýinshe, osy is-sharalardy júzege asyrýdyń nátijesinde bir dárigerge bekitilgen turǵyndardyń sany 1 860-tan 1 700 patsientke deiin tómendeidi.
«2025 jylǵa deiin eski jáne apatty meditsinalyq uiymdar jelisin jańartý úshin 50 jańa nysan qurylysy júrgiziledi. Onyń ishinde MJS tetigi arqyly qalalarda 20 iri zamanaýi klinika, 5 respýblikalyq ǵylymi ortalyq, 2 respýblikalyq aýrýhana, 6 qalalyq jáne oblystyq aýrýhana, 16 aýdandyq aýrýhana men emhana salynady», - dedi Aleksei Tsoi.
Sonymen qatar ol jumys istep turǵan 840 meditsinalyq nysan, onyń ishinde aýyldyq jerdegi 766 nysan kúrdeli jóndeýden ótetindigin aitty.
«Osy is-sharalardy júzege asyrýdyń nátijesinde 2023 jyly meditsinalyq uiymdar ǵimaratynyń tozý kórsetkishi 58-den 44 paiyzǵa deiin tómendeidi. Buǵan qosa, densaýlyq saqtaýǵa jeke investorlardyń úlesi 37-den 42,8 paiyzǵa deiin artady», - dedi ministr.
