2022 jyly «Túrkistan-Shymkent-Tashkent» baǵytynda joǵary jyldamdyqty poiyzǵa arnalǵan halyqaralyq temirjoldyń qurylysy bastalady, dep habarlaidy QazAqparat tilshisi.
Túrkistan oblysynyń ákimi Ómirzaq Shókeev atalǵan jobanyń mańyzy zor ekenine toqtaldy. Sondai-aq, óńir basshysy temirjoldyń salynýy Túrkistan óńiriniń ǵana emes, elimizdiń damýyna oń serpin beretinin jetkizdi.
«Apta basynda Nur-Sultanda Qazaqstan Respýblikasynyń Prezidenti Qasym-Jomart Toqaev pen Ózbekstan Respýblikasynyń Prezidenti Shavkat Mirziioev kezdesip, memleketaralyq kelisimderge qol qoidy. Sonyń ishinde Túrkistan oblysyn damytý úshin asa mańyzdy «Túrkistan-Shymkent-Tashkent» temirjoly salynatyny habarlandy. Eki Prezident jobany maquldap, Úkimet basshylaryna atalǵan jobany júzege asyrý jóninde tapsyrma berdi. Ol magistraldyń jobalyq-smetalyq qujaty daiyn», -dedi oblys ákimi.
«Qazaqstan temir joly» kompaniiasy basshylyǵynyń habarlaýynsha, qurylys 2022 jyldyń basynda bastalady. Temirjol Túrkistannan bastalyp, Shymkent qalasymen qatar Ordabasy, Qazyǵurt, Saryaǵash aýdandaryn qamtidy. Joǵary jyldamdyqty temirjol magistraliniń qurylysy aiaqtalǵan soń týrizm jáne ózge de salalarda myńdaǵan jumys orny qurylyp, ishki jáne syrtqy týrizm de qatar damymaq. Sondai-aq osy joba arqyly baýyrlas eki eldiń arasyndaǵy bailanys nyǵaiyp, barys-kelis kóbeiedi.
«Taǵy bir qýanyshty jańalyq, Nur-Sultanda investitsiialyq forým ótti. Sol jerde «Qasqasý» shańǵy týrizm ortalyǵyn salý boiynsha Jol kartasyna jeti jaqty kelisimshartqa qol qoiyldy. Onyń ishinde Úkimet, ministrlikter, sheteldik investor, bankter, ákimshilik bar. Bul týristik ortalyq Túrkistan óńiriniń ekonomikasyn kóterýge úles qosady», – dedi Ó.Shókeev.
Sonymen birge óńir basshysy «Darbaza-Maqtaaral-Jizaq» temir jolynyń qurylysy bastalatynyn, ol eki eldiń taýar ainalymyna oń yqpalyn tigizetinin málimdedi. Sondai-aq, Túrkistan oblysynyń Ózbekstanmen shekaralas aýmaǵynda eki memlekettiń qatysýymen «Ortalyq Aziia» halyqaralyq saýda-ónerkásip kesheni boi kóteretinin jetkizdi.
