2022 jyly taýarlar eksporty 70,4 mlrd AQSh dollaryna deiin ósedi. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat.
«Boljamdyq raýnd aiasynda Ulttyq bank tólem balansy kórsetkishterin baǵalaýdy jańartty. 2021 jyly aǵymdaǵy shot defitsiti ótken jylǵy kórsetkishtermen salystyrǵanda 34,7 paiyzǵa qysqaryp, (-) 4,2 mlrd AQSh dollary deńgeiinde kútiledi. Bazalyq stsenarii kezinde salynǵan munai men metaldyń joǵary baǵasy 2022 jyly 1,5 mlrd AQSh dollary kólemindegi profitsitke alyp keledi. 2022 jyly taýarlar eksporty álemdik suranystyń qalpyna kelýine bailanysty negizgi eksporttalatyn shikizat taýarlary baǵasynyń ósýi esebinen 70,4 mlrd AQSh dollaryna deiin 18,6 paiyzǵa ósedi», - dedi Erbolat Dosaev.
Onyń atap ótýinshe, tólem balansy ádisnamasy boiynsha taýarlar importy halyq pen biznes tarapynan suranystyń ósýi, sondai-aq memlekettik baǵdarlamalar men bastamalardy iske asyrý esebinen 40,9 mlrd AQSh dollaryna deiin 6,8 paiyzǵa ulǵaiady. Joǵary baǵalarǵa jáne munai men metall óndirisiniń kólemine bailanysty sheteldik tikelei investorlar kiristeriniń 4,0 paiyzǵa artýyna qarai kirister balansynyń defitsiti 24,5 mlrd AQSh dollaryna deiin 4,6 paiyzǵa ósedi.
«Osylaisha, energiia resýrstaryna baǵanyń ósýine bailanysty aǵymdaǵy shottyń jaqsarýy import boiynsha keiinge qaldyrylǵan suranystyń iske asyrylýy jaǵynan da, sheteldik investorlarǵa tólenetin tólemderdiń ósýi jaǵynan da qysymmen toqtatylady. Bul, óz kezeginde, valiýta naryǵyna qosymsha qysym jasaidy», - dedi UB tóraǵasy.
