QR Prezident Ákimshiligi Basshysynyń orynbasary Málik Myrzalin 2022 jyly aýyldyq okrýgterdiń biýdjetine salyqtyń qai túrleri beriletin aitty, dep habarlaidy QazAqparat.
«Biýdjetke kelsek, qazir biýdjettiń tórtinshi deńgeii, iaǵni aýyldyq okrýg biýdjetiniń kirisi salyqtyń bes túrinen jinalady. 2022 jyldan bastap salyqtar men tólemderdiń taǵy tórt túri aýyldyq okrýgterge beriledi. Bul negizinen jer salyǵy, jer ýchaskesin paidalanǵany úshin tólem, jer ýchaskelerin satýdan túsetin túsimder jáne t.b. máselelerge qatysty», – dedi Málik Myrzalin «Habar 24» telearnasyna bergen suhbatynda.
Qarjy ministrligi esebi boiynsha, osynyń arqasynda aýyldyq okrýgterdiń biýdjeti qosymsha 16 mlrd teńgemen tolyǵady.
«Budan ári aýyl biýdjetine taǵy da birneshe salyq tólemderin berý josparlanýda – sý resýrstaryn paidalanǵany úshin tólem jáne t.b. Munyń bári aldaǵy jyldary tórtinshi deńgeili biýdjettiń óz-ózin qamtamasyz etý deńgeiin úsh ese arttyrýǵa múmkindik beredi», - dep túiindedi Málik Myrzalin.
Suhbat kezinde ol ákim sailaýyna saiasi partiialardyń qanshalyqty belsedi qatysqany týraly pikir bildirdi.
Aitýynsha, sailanǵan 864 ákimniń 77,7%-y nemese 671 adam – Nur Otan-nyń ókili. «Aýyl» partiiasynan 3,8% iaǵni 33 adam ákim atansa, «Adal» partiiasynan 1,7%, iaǵni 15 ákim, «Aqjol» partiiasynan 1,4% nemese 12 adam, Qazaqstan halyq partiiasynan 1,3% nemese 11 adam jáne JSDP-dan 0,1%, iaǵni 1 adam sailanǵan.
