2022 jylǵy 1 qańtardan gaz jelisi uiymdaryn akkreditteý institýty kúshin joiady. Bul jaiynda Májilis depýtattarynyń saýalyna QR Premer-Ministriniń orynbasary Roman Skliardiń jaýabynda aitylǵan, dep habarlaidy QazAqparat.
«2020 jylǵy jeltoqsan aiynda «Qazaqstan Respýblikasynyń keibir zańnamalyq aktilerine Memleket basshysynyń 2020 jylǵy 1 qyrkúiektegi «Qazaqstan jańa naqty ahýalda: is-qimyl ýaqyty» atty Qazaqstan halqyna Joldaýynyń jekelegen erejelerin iske asyrý máselesi boiynsha ózgerister men tolyqtyrýlar engizý týraly» Zań qabyldandy. Onyń aiasynda 2022 jylǵy 1 qańtardan bastap gaz jelisi uiymdaryn akkreditteý institýtynyń kúshin joia otyryp, suiytylǵan munai gazyn (budan ári – SMG) elektrondyq saýda alańdaryna (budan ári – ESA) kezeń-kezeńimen ótkizý týraly tiisti túzetýler engizilgen. Sondai-aq jáne ESA arqyly jetkizý úshin málimdeletin SMG úlesiniń mólsherin kelisý boiynsha Básekelestikti qorǵaý jáne damytý agenttiginiń (budan ári – Agenttik) quzyreti kózdelgen», - delingen Úkimet basshysy orynbasarynyń jaýabynda.
Onyń atap ótýinshe, qoldanystaǵy tetikten SMG-ni ESA arqyly tolyq iske asyrýǵa kóshý naryqtyń barlyq qatysýshylary úshin tikelei óndirýshilerden SMG kólemderin satyp alýǵa teń jáne kemsitpeitin jaǵdailar jasaýdy qamtamasyz etýge múmkindik beredi. Bul básekelestikti damytýǵa yqpal etedi, naryqqa tiimsiz deldaldardyń áserin qysqartýǵa múmkindik beredi. Sondai-aq, shaǵyn orta biznesti damytý úshin qolaily jaǵdailar jasaidy.
«Osy jylǵy qarashada SMG-ny ESA arqyly ótkizýdiń jalpy kóleminiń úlesi 70 paiyzdy qurady. ESA-dan tys ótkiziletin SMG-ǵa Energetika ministrligi toqsan saiyn bekitetin kóterme shekti baǵa (2021 jylǵy 4 toqsanǵa baǵa qosylǵan qunǵa salynatyn salyqsyz tonnasyna 38 701 teńge deńgeiinde bekitildi) boiynsha beriledi. Óz kezeginde, ESA arqyly ótkiziletin SMG baǵasy suranys pen usynys negizinde qalyptasady. Bul rette, búgingi kúni SMG ishki naryǵyn qamtamasyz etý jáne baǵa belgileý tetigin jetildirý jónindegi barlyq qajetti sharalar qabyldanyp jatqanyn habarlaimyz. Osylaisha, «Elektrondyq saýda alańdary arqyly suiytylǵan munai gazy saýda-sattyǵyn uiymdastyrý jáne ótkizý qaǵidalaryn bekitý týraly «Energetika ministriniń 2018 jylǵy 6 jeltoqsandaǵy № 481 buiryǵyna ózgerister men tolyqtyrýlar engizý týraly» buiryǵynyń jobasy ázirlendi», - dedi Roman Skliar.
