QR Qarjy naryǵyn retteý jáne damytý agenttiginiń tóraǵasy Mádina Ábilqasymova pandemiiada shaǵyn jáne orta bizneske qandai kómek kórsetilgenin aitty, dep habarlaidy QazAqparat.
«Sońǵy eki jylda álemdegi, bizdiń elimizdegi jáne qarjy sektoryndaǵy jaǵdai aitarlyqtai ózgerdi. Álem koronavirýs pandemiiasynan týyndaǵan buryn-sońdy bolmaǵan daǵdarysqa ushyrady. 2020 jylǵy daǵdarys bizdiń elimiz úshin de barynsha mańyzdy syn-qater boldy. Ekonomika men qarjy júiesine kúizelisterdiń áserin jumsartý úshin retteýshiniń birinshi kezektegi mindeti – qarjy naryǵynyń turaqtylyǵyn qamtamasyz etý, kapital men bank ótimdiligin, saqtandyrý uiymdarynyń jáne qarjy naryǵyndaǵy basqa qatysýshylardyń turaqtylyǵyn qoldaý boldy», - dedi M. Ábilqasymova Qazaqstan qarjygerleriniń IX Kongresinde.
Osyǵan orai 2020 jylǵy naýryzdan bastap qarjy uiymdarynyń kapitalyna jáne ótimdiligine qoiylatyn talaptardy báseńdetýge baǵyttalǵan prýdentsiialyq retteýdiń ýaqytsha sharalary engizildi.
«Ekonomikalyq belsendiliktiń tómendeýi jaǵdaiynda biznes sýbektileri úshin kreditterdiń qoljetimdiligin qamtamasyz etý mańyzdy boldy. Ulttyq bank Biznesti jeńildikpen kreditteý baǵdarlamasyn iske qosty, sondai-aq qaryzdarǵa kepildik berý jáne sýbsidiialaý boiynsha BJK-2025 quraldary keńeitildi», - dep atap ótti spiker.
Memleket basshysynyń tapsyrmasymen ekonomikanyń zardap shekken sektorlarynda kásipkerlerge qoldaý kórsetý úshin barlyq ShOB sýbektilerine 6%-ǵa deiin mólsherlemelerdi sýbsidiialaý qamtamasyz etildi, ol biylǵy 31 tamyzǵa deiin uzartyldy. Sýbsidiialardy 740 mlrd teńgege 4 839 kompaniia aldy.
«Bankter daǵdarysqa qarsy sharalardy qoldady jáne 2020 jyl boiy jáne 2021 jyldyń birinshi jartysynda zardap shekken salalarda ShOB úshin kreditterdi keiinge qaldyryp, qaita qurylymdady. Nátijesinde 2019 jylǵy 13% bolǵan teris mánmen salystyrǵanda 2020 jyldy ShOB kreditteriniń 7,2%-ǵa ósýimen aiaqtadyq. 2021 jylǵy sáýirden bastalǵan ekonomikalyq ósýdi qalpyna keltirý aiasynda biylǵy 9 aida ShOB kreditteriniń ósýi 18,6%-dan, al ekonomikaǵa kreditterdiń jalpy ósýi 16%-dan asty», - dedi QNRDA tóraǵasy.
