QR Prezidentiniń kómekshisi Erlan Qarin 2021 jyly Memleket basshysynyń qandai áleýmettik bastamalary júzege asyrylǵanyna sholý jasady, dep habarlaidy QazAqparat.
«Biyl qazaqstandyqtardyń ál-aýqatyn arttyrýǵa baǵyttalǵan birqatar prezidenttik bastama júzege asyryldy. Olardyń tiimdiligin azamattaryń túrli sanatyndaǵy ókilderi naqty sezindi. Bastamalardyń basym bóligin Memleket basshysy Ulttyq qoǵamdyq senim keńesiniń alańynda usynǵan bolatyn», - dep jazdy QR Prezidentiniń kómekshisi Telegram kanalynda.
Sonymen Memleket basshysynyń biyl júzege asyrylǵan áleýmettik bastamalary mynalar:
• Zeinetaqy jinaǵynyń jetkiliktilik sheginen asatyn bóligin merziminen buryn sheshý alý tetigi engizildi. Jarty millionnan astam adam artyq qarajattaryn zeinetaqy qorynan alyp, turǵyn úi jaǵdaiyn jaqsartty.
• Alǵash ret joǵary oqý ornyna qabyldaý kvotasy aiasynda áleýmettik az qamtylǵan azamattarǵa jańa úsh baǵytta memlekettik bilim granttary taǵaiyndaldy. Nátijesinde kópbalaly otbasydan, tolyq emes otbasydan, sonymen qatar múgedek bala tárbielep otyrǵan otbasydan shyqqan 5 myńnan astam talapker granta ie boldy.
• Erekesh bilim berý qajettiligi bar balalardy oqytýǵa arnalǵan qarjylandyrýdyń jan basyna shaqqandaǵy normativi arttyryldy.
• Oqýshylar jan basyna qarjylandyrý arqyly memlekettik tapsyrystyń engizilýiniń arqasynda shyǵarmashylyq úiirmeler men sport sektsiialaryna tegin barý múmkindigin aldy.
• «Ańsaǵan sábi» arnaýly baǵdarlamasy iske qosyldy. Onyń aiasynda jyl saiyn asandy jolmen uryqtandyrýǵa 7 myń kvtota bólinedi.
• Elimizdiń 6 óńirinde múgedektikti belgileý boiynsha proaktivti syrttai qyzmet kórsetý ilki jobasy júzege asyryldy. 2021 jyldyń jeltoqsanynda bul tájiribe búkil elimizge taratyldy.
• «Tabaldyryqtan tabaldyryqqa deiin printsipimen» múgedektigi bar tulǵalar jáne ózge de qozǵalysy shekteýli azamattar úshin kedergisiz qoljetimdilikti qamtamasyz etý boiynsha is-sharalar qabyldandy. Suranysy joǵary nysandardyń kartasy ázirlendi. Karta qozǵalysy shekteýli azamattarǵa olardyń qoljetimdiligin turaqty monitoringileýge jáne memlekettik baqylaýdy júzege asyrýǵa múmkindik beredi.
• 2021 jyldyń qańtarynan pedagogikalyq qyzmetkerlerdiń jalaqysy 25 paiyzǵa ulǵaityldy.
• Prezident qyrkúiektegi Joldaýynda mádeniet, muraǵat, kitaphana salasy qyzmetkerleriniń, tehnikalyq jumysshylardyń, qoryqshylardyń, júrgizýshilerdiń jáne basqa qyzmetkerlerdiń jalaqysyn kóterýdi tapsyrdy. Bul sanatqa kiretin jumysshylardyń jalaqysy 2022 jyldan 2025 jylǵa deiin jyl saiyn ortasha eseppen 20 paiyzǵa artyp otyrady.
• 2022 jylan bastap eń tómengi jalaqy mólsheri 40 paiyzǵa, 42 500 teńgeden 60 myń teńgege artady. Bul is-shara qalai bolǵanda da jumys isteitin barlyq qazaqstandyqqa qatysty bolady.
• Politsiianyń jáne quqyq qorǵaý organdarynyń jedel tergeý bólimsheleriniń halyqpen jumys isteýge arnalǵan barlyq qyzmettik oryn-jailarynda tolyqtai beinebaqylaý engizildi. Bul olardyń qyzmetiniń ashyqtyǵyn arttyrýǵa múmkindik beredi. Sonymen qatar Ishki ister ministriginiń qurylymynda áielder men balalardy zorlyq-zombylyqtan qorǵaý arnaýly bólimshesi qaita ashylyp, shtaty keńeitildi.
«Jáne de bul azamattardyń ómir sapasyn ret-retimen arttyratyn ózgeristerdiń bir parasy ǵana. Prezident áleýmettik mańyzy bar máselelerge basa nazar aýdaryp, olardy sheshý úshin naqty is-sharalar men qadamdarǵa bastamashylyq jasaidy. «Adam memleket úshin emes, memleket adam úshin» printsipi elimizde júrgizilip jatqan reformalardyń, sonymen qatar búkil memlekettik saiasattyń aiasynda saqtalady», - dedi Erlan Qarin.
