QR Prezidentiniń kómekshisi Erlan Qarin Memleket basshysy Qasym-Jomart Toqaevtyń jyl boiy iske asyrǵan reformalaryna sholý jasady, dep habarlaidy QazAqparat.
«2021 jyl elimiz úshin kezekti reformalar jyly boldy. Áýel bastan saiasi blok pen quqyq qorǵaý problematikasy qarqyndy ózgeristerdiń salasyna ainaldy», - dep jazdy ol Telegram-kanalynda.
Erlan Qarinniń aitýyna qaraǵanda, jyl ishinde atalǵan salalarda mynadai mańyzdy sapalyq ózgerister iske asqan:
1) Mamyr aiynda Prezident saiasi partiialar úshin Májiliske ótý shegin 7-den 5%-ǵa deiin tómendetýdi kózdeitin zańǵa qol qoidy.
2) Bul zań barlyq deńgeidegi sailaý biýlletenderinde «Bárine qarsymyn» degen baǵandy bekitti.
3) Maýsym aiynda Prezidenttiń arnaiy jarlyǵy boiynsha Úkimet adam quqyqtary salasyndaǵy birinshi kezektegi sharalar josparyn bekitti. Ol adam saýdasy qurbandarynyń, múgedek adamdardyń quqyqtaryn qamtamasyz etýge, qylmystyq sot tóreligi salasynda adam quqyqtaryn qamtamasyz etýge, azaptaýlar men qatygez qarym-qatynastyń aldyn alýǵa jáne t. b. baǵyttalǵan pármendi sharalardyń keń jiyntyǵyn qamtidy.
4) 25 shildede Qazaqstanda alǵash ret aýyldyq okrýg ákimderiniń tikelei sailaýy ótti. Ótken sailaýdyń nátijesinde aýyl ákimderiniń korpýsy 50%-dan astam jańardy.
5) Qyrkúiek aiynda Prezident kezekti Joldaýynda depýtattyq mandattardy bólý kezinde áielder men jastar úshin 30 paiyzdyq kvotany zańnamalyq túrde bekitýdi usyndy. Memleket basshysy erekshe muqtajdyqtary bar adamdardy qosa otyryp, partiialardyń sailaý tizimderindegi azamattardyń kvotalanatyn sanattarynyń tizbesin keńeitýdi usyndy. Atalǵan normalar boiynsha zań jobasy ázirlendi.
6) Joldaýda quqyq qorǵaýshylardyń quqyqtaryn qorǵaý, qylmystyq protsesti jetildirý boiynsha odan ári sharalar qabyldaý qajettigi belgilendi. Sondai-aq, politsiianyń servistik modelin keńeitý mindeti qoiyldy. Kelesi jyldan bastap bul tájiribe búkil elge taratylatyn bolady.
7) Adam quqyqtary jónindegi ýákil institýtyn júieli nyǵaitýdy jáne ólim jazasyn tolyq joiýdy kózdeitin eki zańnyń ázirlenýi de quqyq qorǵaý salasyndaǵy úlken progreske yqpal etti.
«Bul Memleket basshysynyń saiasi reformalar blogy boiynsha eń eleýli bastamalary ǵana. Olardy tolyq iske asyrý úshin biyl 2 Jarlyq pen 6 Zań qabyldandy.
Jalpy Prezident usynǵan barlyq saiasi jańashyldyqtar boiynsha aýqymdy ári josparly jumystar júrgizilip jatyr. Sondyqtan saiasat jáne quqyq qorǵaý salalarynda naqty ózgeristerdi júzege asyrý baǵyty 2022 jyly da saqtalady», - deidi Prezident kómekshisi.
