Ádilet ministrligi óńirlerde sot saraptamasy ǵimaratyn salý baǵytyndaǵy jumystardy jariialady, dep habarlaidy QazAqparat.
«Búginde ministrlik úshin joǵary standarttar men talaptarǵa sai keletin qyzmettik ǵimaratpen sot saraptamasy organdaryn qamtamasyz etý negizgi másele bolyp otyr. Osy oraida bul taqyryp vedomstvo úshin basymdyqty sipatqa ie. Ony sheshý úshin óńirler ákimdikterimen tiisti jumystar atqaryldy», - dep atap ótti Ádilet vitse-ministri Almat Madaliev vedomstvonyń keńeitilgen alqa májilisinde.
Onyń sózine qaraǵanda, Qostanai jáne Batys Qazaqstan oblystary institýttaryna ákimdikter qajetti ǵimaratty bóldi. Al Aqtóbe oblysynda institýt ǵimaratyn salý úshin jergilikti biýdjet esebinen jobalyq-smetalyq qujatnama ázirlenip, 1,5 gektar jer telimi qarastyryldy.
«Nur-Sultan qalasynda ǵimarattyń qurylysyna jer ýchaskesi bólinip, respýblikalyq biýdjetten qajetti qarajat eskerildi. Shymkent qalasynda da osyndai qadamdar arqyly ǵimarat salý josparlanyp otyr», - dedi A. Madaliev.
Tilshiler saýalyna jaýap berý barysynda Ádilet ministri Marat Beketaev respýblikalyq biýdjet esebinen elordadaǵy ǵimart qurylysyn 2020 jyly bastaý kózdelgenin aitty.
«Ár oblysta halyq sany ártúrli ekeni belgili, sondyqtan qajettilik kólemi de ózgeshe bolady. Nur-Sultan qalasy úshin qurylysqa 1,5 mlrd teńgege jýyq qarjy qarastyrylǵan. Jobalyq-smetalyq qujatnama zamanaýi standarttar boiynsha ázirlengen. Onda tek máiithana ǵana emes, sonymen qatar sot saraptamasynyń ózge de qyzmetteri qamtylady. Atap aitqanda, barlyq sot sarapshylaryn bir nysanda ornalastyrǵan durys bolady, bul óz kezeginde quqyq qorǵaý organdaryna da qolaily», - dedi Marat Beketaev.
Belgili bolǵandai, elordadaǵy ǵimarattyń qurylysyn 2021 jyly aiaqtaý josparlanyp otyr.
«Bul ǵimarat kúrdeli nysandardyń qataryna jatady. Máselen, onda tirge arnaiy oryn bólý eskerilgen. Ballistikalyq saraptamalar úshin qarýdy tekserý kerek bolady. Sáikesinshe, barlyq standarttarǵa sai keletin tir jasaqtalýy tiis», - dedi ministr.
