Elordada sońǵy 5 jylda kámeletke tolmaǵandar arasynda sýitsid áreketteriniń 380 jaǵdaiy tirkeldi. Bul týraly elordanyń Qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva málim etti, dep habarlaidy QazAqparat.
«Kámeletke tolmaǵandardyń sýitsidtik áreketterine monitoringti meditsinalyq uiymdardyń derekteri boiynsha óz quzyreti sheginde Nur-Sultan qalasy ákimdiginiń qalalyq psihikalyq densaýlyq saqtaý ortalyǵynyń mamandary júrgizedi. Kámeletke tolmaǵan balalardyń sýitsid áreketterin qarastyrsaq, sońǵy 5 jylda 380 jaǵdai tirkelgen. Onyń ishinde 32 oqiǵada kámeletke tolmaǵandardyń ómiri qiyldy», - dedi Dosmyrzaeva qalalyq máslihattyń turaqty komissiiasynyń otyrysynda.
Onyń aitýynsha, 2017 jyly ózin-ózi óltirýge oqtalýdyń 50 faktisi, 2018 jyly - 44, 2019 jyly - 58, 2020 jyly – 51 jaǵdai, sondai-aq 2021 jyly sýitsid áreketteriniń eń kóp sany, iaǵni 136 jaǵdaiy tirkeldi. Al 2022 jyldyń 4 aiynda qalada kámeletke tolmaǵandar arasynda sýitsid boiynsha 41 fakti anyqtaldy. Biyl tórt aida ózine qol salý saldarynan bir balanyń ómiri qiyldy.
«Kámeletke tolmaǵandar arasynda sýitsid sebepterine qatysty birinshi orynda otbasyndaǵy janjal – 21 jaǵdai (51,2%), qurbylarymen ári dostarymen janjal – 5 jaǵdai (12,2%), depressiiaǵa bailanysty 1 jaǵdai tirkeldi», - dedi basqarma ókili.
Onyń sózine qaraǵanda, qazirgi kezde qala emhanalarynda 60 psiholog jumys isteidi. Qalalyq emhanalardaǵy psihologtar shtatyn jasaqtaý 80 paiyzdy qurady. Emhana aýmaǵyndaǵy árbir mektepke dáriger bekitilgen.
«2022 jyldyń 4 aiynda shuǵyl psihologiialyq kómek kabinetine 93 patsient júgindi, bul 2021 jyldyń sáikes kezeńimen salystyrǵanda 26 jaǵdaiǵa kóp. 4 jaǵdaida jasóspirimder ózine qol salý áreketterin jasaǵannan keiin psihiatriialyq statsionarǵa jatqyzyldy. Qazirgi ýaqytta olar ambýlatoriialyq jaǵdaida kómek alýdy jalǵastyryp jatyr», - dedi Gúlnaz Dosmyrzaeva.
