Eńbek jáne halyqty áleýmettik qorǵaý ministri Birjan Nurymbetov elimizde 2020 jyldyń 1 qańtarynan bastap zeinetaqy mólsheri qanshaǵa ósetinine qatysty pikir bildirdi, dep habarlaidy QazAqparat.
Ministrdiń aitýynsha, Qazaqstanda ortasha zeinetaqy kólemi 86 myń, maksimaldy mólsheri 117 myń teńge.
«Elimizde zeinetaqy tólemine qatysty eshqandai másele joq. Ai saiyn keste boiynsha berilip jatyr. Bul turaqty júie. Zeinetaqy mólsheri jyl saiyn infliatsiia deńgeiinen +2 paiyzǵa artyp keledi. Ótken jyly – 2018 jyldyń ortasynda bazalyq zeinetaqy tólemi aitarlyqtai ósti. Odan bólek, ártúrli deńgeidegi járdemaqylar da bar. Máselen, búgingi biz quttyqtaǵan Aleksandr Torkin qatarly soǵys ardagerleriniń zeinetaqysyna qosymsha beriletin 40 myń teńgelik járdemaqy bar», - dedi Birjan Nurymbetov ardager Aleksandr Torkinniń úiine baryp, quttyqtaǵannan keiin tilshilerge bergen suhbatynda.
Ministrdiń aitýyna qaraǵanda, 2020 jyldyń 1 qańtarynda da zeinetaqy mólsheri mindetti túrde ósedi.
«Zeinetaqy tólemi infliatsiianyń ortasha deńgeiinen +2 paiyzǵa ósedi. Zeinetaqynyń minimaldy mólsheri – qazirgi tańda 36 myń teńge, bazalyq zeinetaqymen qosqanda - 54 myń teńge», - dedi ol.
Eske sala ketsek, Eńbek jáne halyqty áleýmettik qorǵaý ministri Birjan Nurymbetov Qarttar kúnine orai jasy júzge kelgen elorda turǵyny Aleksandr Torkindi úiine baryp, quttyqtap qaitqan bolatyn.
