QR Eńbek jáne halyqty áleýmettik qorǵaý ministrligi mamandarynyń boljamy boiynsha 4 nemese odan kóp balasy bar 340,3 myń otbasy kópbalaly bolýyna bailanysty memlekettik járdemaqyǵa úmitker bola alady. Bul týraly Eńbek jáne halyqty áleýmettik qorǵaý ministrliginen málim etti.
Aita keterligi, atalǵan járdemaqy engizilgen kezde Qazaqstandaǵy kópbalaly otbasylar sanynyń artýyna bailanysty bul tólemdi alýshylar sany da artýy múmkin.
«Atalǵan memlekettik járdemaqyny engizý - Memleket basshysynyń biylǵy Qazaqstan halqyna Joldaýynda aitylǵan tapsyrmasy boiynsha QR Eńbek ministrligi ázirlegen ataýly áleýmettik kómek kórsetýdiń jańa tetikterinde kózdelgen tabysy az jáne kópbalaly otbasylardy qoldaýdyń negizgi úsh baǵytynyń biri bolyp sanalady. Taiaýda QR Eńbekmini tiisti zań jobasyn QR Parlamentiniń qaraýyna engizýdi josparlap otyr. Joǵaryda atalǵan memlekettik járdemaqy 4 nemese odan da kóp kámeletke tolmaǵan nemese 23 jasqa deiingi kúndizgi bólimde oqityn balalary bar barlyq kópbalaly otbasylarǵa tabysyna qaramastan tólenedi dep josparlanýda. Memlekettik járdemaqynyń mólsheri bala sanyna qarai saralanady. Iaǵni, 4 balasy bar otbasylarǵa 42 500 teńge, 5 balaǵa – 53 125 teńge, 6 balaǵa – 63 750 teńge, 7 jáne odan da kóp balalarǵa 74 375 teńge tólenedi», - delingen ministrlik málimetinde.
Orta eseppen alǵanda, járdemaqy mólsheri ár balaǵa 10-11 myń teńgeni quraidy.
Aita keterligi, Qazaqstanda búginde bala sany 7-den asatyn 3151 otbasy bar. «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan jáne «Ana dańqy» ordenimen marapattalǵan kópbalaly analarǵa jeke memlekettik járdemaqy tólenedi, olardyń ortasha mólsheri 16 160 teńgeni quraidy. Aǵymdaǵy jylǵy 1 qazandaǵy jaǵdai boiynsha ony 235 myńǵa jýyq adam alady. Bul memlekettik járdemaqynyń tólenýi saqtala bermek.
Budan buryn habarlanǵandai, aǵymdaǵy jylǵy 7 qazanda QR Úkimeti otyrysynda Eńbek jáne halyqty áleýmettik qorǵaý ministri Birjan Nurymbetov Qazaqstanda 2020 jylǵy 1 qańtardan bastap engizý josparlanyp otyrǵan AÁK kórsetýdiń jańa tetikterin tanystyrǵan bolatyn.
AÁK tabysy az otbasylarǵa, sonyń ishinde kópbalaly otbasylarǵa tólenetin bolady. Eń tómen kúnkóris deńgeiiniń 70%-y taǵaiyndaýdyń shekti kriteriii bolyp qala beredi. Eger eńbekke qabiletti otbasy múshesi usynylǵan jumystan jáne jumyspen qamtýǵa járdemdesý sharalarynan bas tartsa, onda AÁK tólemi tek oǵan ǵana emes, búkil otbasyna da toqtatylady.
Tabysy az otbasylardan shyqqan balalar úshin kepildendirilgen áleýmettik paketti engizý usynylady. 1 jastan 6 jasqa deiingi balalardy azyq-túlik jiyntyǵymen jáne gigienalyq quraldarmen, 6 jastan 18 jasqa deiingi balalardy mektepterde ystyq tamaqpen, oqý quraldarymen jáne mektep kiimimen qamtamasyz etedi, sondai-aq olarǵa mektepke deiingi jol júrý shyǵyndary óteledi. Meditsinalyq, onyń ishinde stomatologiialyq kómek 18 jasqa deiingi balalarǵa tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý aiasynda kórsetiletin bolady.
Budan buryn habarlanǵandai, kópbalaly otbasylardyń quramyndaǵy balalarǵa tabysqa qaramastan belgilenetin memlekettik járdemaqy 2020 jyldan bastap tólenedi.
