Premer-Ministr Asqar Maminniń tóraǵalyǵymen ótken Qazaqstan Respýblikasy Úkimetiniń zań jobalaý jumystarynyń 2019 jylǵa arnalǵan josparynyń oryndalý barysy jáne 2020 jylǵa arnalǵan jobasy týraly Úkimet otyrysynda ádilet ministri Marat Beketaev baiandama jasady.
M. Beketaev atap ótkendei, Úkimettiń zań jobalaý jumystarynyń 2019 jylǵa arnalǵan jospary bekitilgen kezde onymen 27 zań jobasyn ázirleý jáne Parlamentke engizý kózdelgen bolatyn. Alaida, ázirleýshi organdardyń usynystary negizinde Josparǵa jyl ishinde engizilgen túzetýlerdi eskere otyryp, onymen qazirgi ýaqytta 32 zań jobasyn ázirleý kózdeledi. Olardyń barlyǵy Parlament qaraýyna engizildi.
«Onyń ishinde 3 zań jobasyna Memleket basshysy qol qoidy, jiyrma 9 zań jobasy Parlamenttiń qaraýynda», — dedi ministr.
Jyl ishinde Josparǵa 10 ret túzetýler engizildi. Atalǵan túzetýlermen 4 zań jobasy engizildi, 12 zań jobasy boiynsha merzimder aýystyryldy, bir zań jobasy ekige bólindi.
M. Beketaevtyń aitýynsha, zań jobasynyń tujyramdamasyn ázirleý satysynda quqyq qoldaný tájiribesine sapasyz taldaýdy júrgizý, sondai-aq ázirleýshi memlekettik organdardyń birinshi basshylarynyń tarapynan qajetti baqylaýdyń bolmaýy josparda belgilengen merzimderdiń buzýlýynyń negizgi sebepteri bolyp tabylady.
Sonymen qatar, ázirleýshi memlekettik organdar zań jobalarynyń erejelerin maqsatty toptarmen talqylaý boiynsha tiisti jumysty júrgizbegen. Bul faktorlar 2019 jylǵa josparlanǵan zań jobalardyń merzimderiniń jartysyn aýystyrýǵa alyp keldi.
«Nátijesinde, II jartyjyldyqta Parlamentke 13 zań jobasy emes, 25 zań jobasy engizildi, iaǵni bastapqyda josparlanǵan sanynan eki ese kóp. Bul árine, Parlament depýtattary men Prezident Ákimshiligi tarapynan negizdi synǵa ákeldi», — dedi M. Beketaev.
Zań jobalaý máseleleri boiynsha da birneshe jinalystar ótkizildi. Atqarylǵan jumystardyń nátijesinde Ádilet ministrligimen zań jobalaý qyzmetine baqylaýdy kúsheitýge jáne zań shyǵarmashylyq jumysynyń sapasyn arttyrýǵa baǵyttylǵan birqatar sheshimderge túzetýler ázirlendi. Atalǵan túzetýler josparlanǵan zań jobanyń merzimin aýystyrǵany nemese merzimderin buzǵany úshin ázirleýshi-memlekettik organnyń jaýapty tulǵalarynyń jaýapkershiligin arttyrýdy kózdeidi. Bul túzetýler barlyq ministrliktermen kelisildi. Tiisti qaýly jobasy Premer-Ministr Keńsesiniń qaraýynda.
Buǵan qosa, zańdardy ázirleý, olar boiynsha qoǵamdyq talqylaý jáne qabyldaý rásimderin jetildirý maqsatynda, Ádilet ministrligi zań shyǵarý protsesin jetildirý máseleleri boiynsha zańnamalyq túzetýler toptamasyn ázirledi. Tiisti zań jobasy Úkimet otyrysynda maquldandy jáne jaqynda Parlament qaraýyna engiziletin bolady.
«Bizdiń pikirimizshe, joǵaryda atalǵan ustanymdar Úkimettiń zań jobalaý jumystaryn sapaly josparlaýdy, sondai-aq Úkimetke jáne Parlamentke zań jobalaryn ýaqytyly engizýge oń áser etedi», — dedi ministr.
Sonymen qatar Marat Beketaev Úkimettiń zań jobalaý jumystarynyń 2020 jylǵa arnalǵan jospar jobasy týraly aitty.
Ádilet ministrligi Zań jobalaý qyzmeti máseleleri jónindegi vedomstvoaralyq komissiia múshelerimen birlesip Úkimettiń zań jobalaý jumystarynyń 2020 jylǵa arnalǵan jospar jobasyn ázirledi. Jospar jobasy Prezident tapsyrmalarynyń jáne strategiialyq qujattarda aiqyndalǵan mindetter negizinde ázirlendi.
Jospar jobasy 17 zań jobasyn ázirleýdi kózdeidi. Ázirlenetin zań jobalary túrli salalardy odan ári damytýǵa baǵyttalǵan. Mysaly, áleýmettik qamsyzdandyrý, dene shynyqtyrý jáne sport, áskeri qyzmet jáne arnaiy memlekettik organdar qyzmetkerleri men áskeri qyzmetshilerdiń turǵyn úi qatynastary t.b.
Aldaǵy jyly «Erekshe taýarlardy baqylaý týraly», «Ósimdikter álemi týraly» jáne «Ardagerler týraly» jańa jekelegen zań jobalaryn ázireý kózdelip otyr.
Jospar jobasynda Memleket basshysynyń Qazaqstan halqyna Joldaýyn, sondai-aq Prezidenttiń sailaýaldy baǵdarlamasyn iske asyrýǵa baǵyttalǵan birqatar zań jobalary kózdelgen. Olar - memlekettik satyp alýlar, dene shynyqtyrý jáne sport, aýdandyq, qalalyq jáne aýyldyq deńgeidegi biliktiń derbestigi men jaýapkershiligin keńeitý máseleleri boiynsha zań jobalary.
Mysaly, memlekettik satyp alýlar máseleleri boiynsha zań jobasyn ázirleý satyp alý rásimderin ońailatý jáne ótkizý rásimderinde artyq retteýdi joiý nátijesinde memlekettik satyp alýlardy tiimdi ótkizýge yqpal etetin bolady. Ázirlenetin zań jobaladyń eń kóbi Indýstriia jáne infraqurylymdyq damý ministrligi men Eńbek jáne halyqty áleýmettik qorǵaý ministrligine tiesili, árqaisysy 3 zań jobasynan ázirleidi.
Qarjy, ulttyq ekonomika, syrtqy ister, mádeniet jáne sport, geologiia jáne tabiǵi resýrstar, ministrlikteri eki zań jobasynan ázirleitin bolady. Qorǵanys ministrligi bir zań jobasyn ázirleidi.
Ministr atap ótkendei, zań jobalaryn Parlamentke usyný merzimderi birkelkilik jaǵyna qarai qaita qaraldy.
Osylaisha, Jospar jobasynda qarastyrylǵan 17 zań jobasynan 2020 jyldyń I jarty jyldyǵynda Parlamentke 8 zań jobasyn, al II jarty jyldyqta 9 zań jobasyn engizý kózdelgen.
Jospar jobasy barlyq memlekettik organdarmen jáne Prezident Ákimshiligimen kelisildi.
