Nur-Sultan politseileri aqparattyq tehnologiialar salasyndaǵy qylmystardy anyqtaý baǵytynda belsendi jumys júrgizýde, dep habarlaidy Nur-Sultan qalasynyń Politsiia departamentiniń baspasóz qyzmeti.
Elordada osy jyldyń 9-15 tamyzy aralyǵynda «Anti Fraud» jedel-aldyn alý sharalary ótýde. Onyń maqsaty – kiberqylmystardy boldyrmaý, olardyń aldyn alý jáne anyqtaý.
Kriminaldyq politsiia qyzmetkerleri Elordada eki kún ishinde aqparattyq tehnologiialar salasyndaǵy 18 qylmysty anyqtap, buryn jasalǵan taǵy 20 qylmysty ashyp, segiz kúdikti ustaldy.
Osylaisha, 20 jastaǵy Túrkistan oblysynyń turǵyny «Instagram» áleýmettik jelisi arqyly aqshany ainalymǵa salamyn dep ýáde berip, astana turǵyndarynyń 10 million teńgesin qoldy qylǵan. Odan bólek, uqsas qylmys jasaǵany úshin 38 jastaǵy elordalyq áiel ustaldy. Ol qala turǵyndaryna 12 million teńge kóleminde materialdyq shyǵyn keltirgen.
Nur-Sultan qalasynyń politsiia departamenti internettegi alaiaqtyqtyń keń taraǵan túrleri áleýmettik jelilerdegi onlain kelisimder, «olx.kz jetkizý qyzmetin» qoldanatyn qyzmetter jáne bank kartasynan aqsha urlaý ekenin eske salady.
Sonymen qatar alaiaqtardyń tuzaǵyna túsip qalmaý úshin kez kelgen aqparatty banktiń resmi koll-ortalyqtaryna habarlasyp naqtylaý kerek ekenin eskertedi. Esh jaǵdaida bank kartalarynyń derekterin bóten adamǵa habarlamańyz. Olardyń ishinde bank qyzmetkerleri de bar. Olar kartalardyń ielerine habarlasyp, derekter jinamaitynyn bile júrińiz.
