QR Qorǵanys ministri Nurlan Ermekbaev Qarýly Kúshterdiń pandemiiada qalai jumys istegenin aityp berdi, dep habarlaidy QazAqparat.
«Armiia da – qoǵamnyń bir bóligi jáne pandemiia qarýly kúshterdi ainalyp ótken joq. Jalpy alǵanda pandemiia bastalǵan sátten beri QR Qarýly Kúshterinde bir jyl ishinde 2 myńnan astam adam virýs juqtyryp, aýyrdy. Qazirgi ýaqytta 100-ge jýyq adam em alyp jatyr. Qaitys bolǵandar da bar, olardyń jaqyndary men týystaryna kóńil aitamyz. Al qalǵany aýrýdan jazyldy», - dep jaýap berdi N.Ermekbaev Ortalyq kommýnikatsiialar qyzmetinde tilshi suraǵyna.
Ministrdiń aitýynsha, Qarýly Kúshterdiń 13 myńnan astam áskeri qyzmetshisi koronavirýspen kúres jumystaryna tartylǵan.
«Máselen, Radiatsiialyq, himiialyq jáne biologiialyq qorǵaý bólimshesi dezinfektsiia jumystarymen ainalysty, olar indet órshigen sátte 60 mln sharshy metrden astam aýmaqty tazartty. Bas áskeri-meditsinalyq basqarmanyń dárigerleri, gospitalderi men lazaretteri qatardaǵy turǵyndardy qabyldap, emdeýmen ainalysty. Áskeri-kóliktik aviatsiia gýmanitarlyq júkterdi tasydy, sheteldegi qazaqstandyqtardy elge, eldegi sheteldikterdi – syrtqa tasymaldady. Munyń barlyǵyna qosymsha qarjy bólingen joq, barlyǵy ózimizdiń ishki resýrsymyz esebinen júrgizildi», - dep túsindirdi N.Ermekbaev.
Odan bólek, áskeriler blokbeketterde qyzmet etken, TJ rejimin baqylaý úshin ushqyshsyz ushatyn apparattar qoldanǵan. Patrýl júrgizgen jáne ózge de tapsyrmalardy oryndaǵan.
«Osynyń barlyǵy jaǵdaidy tezirek qolǵa alýǵa kómektesti dep úmittenemiz», - dedi Nurlan Ermekbaev.
