Parlament Májilisiniń jalpy otyrysynda depýtat Dúisenbai Turǵanov sý uńǵymalaryn zertteý men barlaý máselesin kóterdi, dep habarlaidy QazAqparat.
«Qazirgi kezde 2 myńnan astam apatty uńǵymadan sý eshbir qadaǵalaýsyz dalaǵa aǵyp ketip jatyr», - dedi D. Turǵanov Premer-Ministrdiń orynbasary Roman Skliardyń atyna joldaǵan saýalynda.
Onyń aitýynsha, Esep komitetiniń 2022-2024 jyldarǵa arnalǵan biýdjet jobasyn baǵalaý boiynsha qorytyndysynda 2015 jyldan beri barlaý men zertteý jumystary jergilikti atqarýshy organdar quzyretine berilgeni atap ótilgen. Is-sharalardy júzege asyrýdyń monitoringi 2020 jylǵa deiin Ulttyq ekonomika ministrligi tarapynan júrgizildi. 2020 jyldan bastap izdeý-zertteý jumystary turǵysyndaǵy is-sharalar jańa «Nurly jer» baǵdarlamasyna engizilmeýi sebebinen, memlekettik organdar tarapynan baqylaý men úilestirý iske asyrylmady.
«Osynyń nátijesinde, 7 jylda (2012-2019 jyldary) barlaý-zertteý ári tolyq barlaý jumystarynyń jospary sáikesinshe 86 jáne 91 paiyzǵa oryndaldy. Memlekettik organdardyń osyndai kelisilmegen ári tiimsiz is-qimyly halyq úshin, sondai-aq eldiń ekonomikasy úshin teris saldarǵa alyp kelýi múmkin», - dedi depýtat.
