Qaraǵandy oblysynda temir rýdasyn litsenziiasyz óndirip, shetelge zańsyz eksporttaǵandarǵa qatysty sot úkimi shyqty, dep habarlaidy ult.kz.
Bas prokýratýra málimetinshe, oblystyq mamandandyrylǵan tabiǵat qorǵaý prokýratýrasynyń qadaǵalaý barysynda óńirdegi kásiporyndardyń biri tórt jyl boiy temir rýdasyn zańsyz óndirip kelgeni anyqtalǵan. Tergeý málimetinshe, óndirilgen paidaly qazbalar keiin shetelge shyǵarylyp otyrǵan.
Zańsyz áreketter saldarynan memleketke keltirilgen shyǵyn kólemi 2 milliard teńgeden asty.
Tergeý barysynda is boiynsha kúdikke ilingen úsh adam qamaýǵa alynyp, olardyń jalpy quny 360 million teńgeden asatyn múlkine tyiym salyndy.
Qylmystyq is boiynsha memlekettik aiyptaýdy prokýratýra qoldady. Nátijesinde Qaraǵandy oblysynyń Shet aýdandyq soty úsh aiyptalýshyny jer qoinaýyn zańsyz paidalanǵany úshin kináli dep tanyp, olardy ártúrli merzimge bas bostandyǵynan aiyrý jazasyna kesti.
