Almatylyq dáriger, akýsher-ginekolog Altynai Qaraǵoishieva Qalqaman shaǵyn aýdanyndaǵy №1 qalalyq klinikalyq aýrýhananyń perzenthana bóliminde akýsher, ginekolog bolyp 5 jyldan beri jumys isteidi.
Qazir atalǵan perzenthana COVID-19 juqtyrǵan áielderdi bosandyratyn jalǵyz infektsiialyq statsionarǵa ainalǵan. Sondyqtan bul aýrýhanaǵa aqpan aiynan bastap eki ese júkteme túsken.
Basqa perzenthanalardan ereksheligi munda hirýrg, nevropatolog, reanimatolog, kardiolog degen siiaqty mamandar, MRT, KT barlyǵy bar. Basqa perzenthanalar mundai mamandardy syrttan shaqyrady.
«Aqpan aiynda bizdiń perzenthanaǵa qalalyq Qoǵamdyq basqarma ókilderi kelip jinalys ótkizdi. Naýryzdan bastap bizdiń aýrýhana COVID-19 statsionary bolady dep aitty. Búkil qala boiynsha virýs juqtyrǵan júkti áielder osy jerden bosandyrylatyn boldy. Bizdi eshkim májbúrlegen joq. Tańdaý quqyǵy boldy. Basqa jaqqa aýysýymyzǵa eshkim qarsylyq bildirmedi. Biraq, perzenthana ujymy biraýyzdan eshqaida aýyspaimyz dep sheshtik. Elge tóngen indetti tek aýyzbirshilik jeńe alady dep oilaimyn. Aýyr jumystan biz de qashsaq, basqalar da qashsa, alǵy shepte kim qalady?», - dedi Altynai Qaraǵoishieva.
Sol jinalystan soń bólimshede daiyndyq bastalǵan.
«Barlyǵymyzǵa infektsionister, epidemiologter sabaq júrgizdi. Qalai zalalsyzdandyrý kerek, qalai ota jasaý kerek, qalai kiim kiiý kerek degen siiaqty epidemiologiialyq sabaqtardy qaita pysyqtadyq», - dedi A.Qaraǵoishieva.
Altynai isteitin aýrýhana bólimshesinde qazir 5 dáriger jumys isteidi. 3 dáriger kúndiz kezekshilikte bolsa, 2 dáriger túngi aýysymǵa shyǵady.
«Óitkeni qorǵanys kostiýmimen 24 saǵat jumys isteý múlde múmkin emes. Bara salysymen qorǵanys kostiýmin kiemiz. Naýqastardy aralap shyǵamyz. Bir dáriger túsken naýqastardy qabyldaýmen bolsa, ekinshisi ota jasaý, bosandyrý jumysymen ainalysady. Kúnine 2-3 ota jasaýǵa týra keledi. Akýsherlik bólim bolǵan soń, jarty saǵattan keiin ne bolaryn bilmeisiz. Árdaiym daiyn bolý kerek. Qazir qorǵanys kostiýmimen, maskamen áielderdi bosandyryp, ota jasaimyz. Óte yńǵaisyz, terlep júremiz, maskadan iz qalady. Ota kezinde kózildirik terleidi. Úirenýge týra keledi», - dedi dáriger.
Naýryzdan beri perzenthana qyzmetkerlerine aýrahanadan oryn bólingen. Altynai da óziniń áriptesterimen birge 2 ai boiy aýrýhanada qonyp, jumys istegen.
Altynai Qaraǵoishieva 2002-2009 jyldar aralyǵynda S.Asfendiiarov atyndaǵy Qazaq ulttyq meditsinalyq ýniversitetinde bilim alǵan.
Eńbek jolyn Qarasai aýdanynyń Uzynaǵash qalasyna «Diplommen – aýylǵa» baǵdarlamasy boiynsha bastaǵan.
Qazir ol 2 ul, 1 qyz tárbielep otyr. Joldasy Erjan Mámbetov - Ulttyq gvardiianyń 55/71 áskeri bóliminiń 7 rota starshinasy.
Pandemiia alǵash kelgen kezde bul otbasy balalaryn aýylǵa jiberip, 2 ai boiy koronavirýspen kúrestiń alǵy shebinde bolǵan.
«Júkti áielderde kóbinese óz immýniteti bolady. Alaida aýyr halde pnevmoniiamen túsken júktiler de jeterlik. Óitkeni olardyń barlyq organdary qysylyp turady. Sosyn derttiń damýy óte tez. Olar da kishkentai bala siiaqty túske deiin jaqsy bolsa, tústen keiin jaǵdaiy nasharlaýy múmkin. Al nárestelerdiń kópshiligi, 95 paiyzy COVID-19 teris nátijemen dúniege kelip jatyr. Meditsina mamandary az bolǵandyqtan, ońai bolyp jatqan joq. Keshe ainaldyrǵan 2-3 dáriger 7 ota jasap, 6 áieldi bosandyrdyq», - dedi A. Qaraǵoishieva.
