الماتىلىق دەرٸگەر, اكۋشەر-گينەكولوگ التىناي قاراعويشيەۆا قالقامان شاعىن اۋدانىنداعى №1 قالالىق كلينيكالىق اۋرۋحانانىڭ پەرزەنتحانا بٶلٸمٸندە اكۋشەر, گينەكولوگ بولىپ 5 جىلدان بەرٸ جۇمىس ٸستەيدٸ.
قازٸر اتالعان پەرزەنتحانا COVID-19 جۇقتىرعان ەيەلدەردٸ بوساندىراتىن جالعىز ينفەكتسييالىق ستاتسيونارعا اينالعان. سوندىقتان بۇل اۋرۋحاناعا اقپان ايىنان باستاپ ەكٸ ەسە جٷكتەمە تٷسكەن.
باسقا پەرزەنتحانالاردان ەرەكشەلٸگٸ مۇندا حيرۋرگ, نەۆروپاتولوگ, رەانيماتولوگ, كارديولوگ دەگەن سيياقتى ماماندار, مرت, كت بارلىعى بار. باسقا پەرزەنتحانالار مۇنداي مامانداردى سىرتتان شاقىرادى.
«اقپان ايىندا بٸزدٸڭ پەرزەنتحاناعا قالالىق قوعامدىق باسقارما ٶكٸلدەرٸ كەلٸپ جينالىس ٶتكٸزدٸ. ناۋرىزدان باستاپ بٸزدٸڭ اۋرۋحانا COVID-19 ستاتسيونارى بولادى دەپ ايتتى. بٷكٸل قالا بويىنشا ۆيرۋس جۇقتىرعان جٷكتٸ ەيەلدەر وسى جەردەن بوساندىرىلاتىن بولدى. بٸزدٸ ەشكٸم مەجبٷرلەگەن جوق. تاڭداۋ قۇقىعى بولدى. باسقا جاققا اۋىسۋىمىزعا ەشكٸم قارسىلىق بٸلدٸرمەدٸ. بٸراق, پەرزەنتحانا ۇجىمى بٸراۋىزدان ەشقايدا اۋىسپايمىز دەپ شەشتٸك. ەلگە تٶنگەن ٸندەتتٸ تەك اۋىزبٸرشٸلٸك جەڭە الادى دەپ ويلايمىن. اۋىر جۇمىستان بٸز دە قاشساق, باسقالار دا قاشسا, العى شەپتە كٸم قالادى?», - دەدٸ التىناي قاراعويشيەۆا.
سول جينالىستان سوڭ بٶلٸمشەدە دايىندىق باستالعان.
«بارلىعىمىزعا ينفەكتسيونيستەر, ەپيدەميولوگتەر ساباق جٷرگٸزدٸ. قالاي زالالسىزداندىرۋ كەرەك, قالاي وتا جاساۋ كەرەك, قالاي كيٸم كييۋ كەرەك دەگەن سيياقتى ەپيدەميولوگييالىق ساباقتاردى قايتا پىسىقتادىق», - دەدٸ ا.قاراعويشيەۆا.
التىناي ٸستەيتٸن اۋرۋحانا بٶلٸمشەسٸندە قازٸر 5 دەرٸگەر جۇمىس ٸستەيدٸ. 3 دەرٸگەر كٷندٸز كەزەكشٸلٸكتە بولسا, 2 دەرٸگەر تٷنگٸ اۋىسىمعا شىعادى.
«ٶيتكەنٸ قورعانىس كوستيۋمٸمەن 24 ساعات جۇمىس ٸستەۋ مٷلدە مٷمكٸن ەمەس. بارا سالىسىمەن قورعانىس كوستيۋمٸن كيەمٸز. ناۋقاستاردى ارالاپ شىعامىز. بٸر دەرٸگەر تٷسكەن ناۋقاستاردى قابىلداۋمەن بولسا, ەكٸنشٸسٸ وتا جاساۋ, بوساندىرۋ جۇمىسىمەن اينالىسادى. كٷنٸنە 2-3 وتا جاساۋعا تۋرا كەلەدٸ. اكۋشەرلٸك بٶلٸم بولعان سوڭ, جارتى ساعاتتان كەيٸن نە بولارىن بٸلمەيسٸز. ەردايىم دايىن بولۋ كەرەك. قازٸر قورعانىس كوستيۋمٸمەن, ماسكامەن ەيەلدەردٸ بوساندىرىپ, وتا جاسايمىز. ٶتە ىڭعايسىز, تەرلەپ جٷرەمٸز, ماسكادان ٸز قالادى. وتا كەزٸندە كٶزٸلدٸرٸك تەرلەيدٸ. ٷيرەنۋگە تۋرا كەلەدٸ», - دەدٸ دەرٸگەر.
ناۋرىزدان بەرٸ پەرزەنتحانا قىزمەتكەرلەرٸنە اۋراحانادان ورىن بٶلٸنگەن. التىناي دا ٶزٸنٸڭ ەرٸپتەستەرٸمەن بٸرگە 2 اي بويى اۋرۋحانادا قونىپ, جۇمىس ٸستەگەن.
التىناي قاراعويشيەۆا 2002-2009 جىلدار ارالىعىندا س.اسفەنديياروۆ اتىنداعى قازاق ۇلتتىق مەديتسينالىق ۋنيۆەرسيتەتٸندە بٸلٸم العان.
ەڭبەك جولىن قاراساي اۋدانىنىڭ ۇزىناعاش قالاسىنا «ديپلوممەن – اۋىلعا» باعدارلاماسى بويىنشا باستاعان.
قازٸر ول 2 ۇل, 1 قىز تەربيەلەپ وتىر. جولداسى ەرجان مەمبەتوۆ - ۇلتتىق گۆاردييانىڭ 55/71 ەسكەري بٶلٸمٸنٸڭ 7 روتا ستارشيناسى.
پاندەمييا العاش كەلگەن كەزدە بۇل وتباسى بالالارىن اۋىلعا جٸبەرٸپ, 2 اي بويى كوروناۆيرۋسپەن كٷرەستٸڭ العى شەبٸندە بولعان.
«جٷكتٸ ەيەلدەردە كٶبٸنەسە ٶز يممۋنيتەتٸ بولادى. الايدا اۋىر حالدە پنەۆمونييامەن تٷسكەن جٷكتٸلەر دە جەتەرلٸك. ٶيتكەنٸ ولاردىڭ بارلىق ورگاندارى قىسىلىپ تۇرادى. سوسىن دەرتتٸڭ دامۋى ٶتە تەز. ولار دا كٸشكەنتاي بالا سيياقتى تٷسكە دەيٸن جاقسى بولسا, تٷستەن كەيٸن جاعدايى ناشارلاۋى مٷمكٸن. ال نەرەستەلەردٸڭ كٶپشٸلٸگٸ, 95 پايىزى COVID-19 تەرٸس نەتيجەمەن دٷنيەگە كەلٸپ جاتىر. مەديتسينا ماماندارى از بولعاندىقتان, وڭاي بولىپ جاتقان جوق. كەشە اينالدىرعان 2-3 دەرٸگەر 7 وتا جاساپ, 6 ەيەلدٸ بوساندىردىق», - دەدٸ ا. قاراعويشيەۆا.
