Foto: TJM baspasóz qyzmeti
Oral qalasy ákimdigi qaýipti aýmaq turǵyndaryna kóshýge daiyn bolý kerektigin eskertti. Mamandardyń aitýynsha, Resei Federatsiiasynan sýdyń mol kólemi 2-3 kúnde qalaǵa jetedi. Qaýipti deńgei 8,5 metr bolsa, qazir Jaiyqtyń deńgeii 8 metrge jýyqtady.
Sý tasqynyna qarsy jumysqa jergilikti atqarýshy organnyń jáne tótenshe jaǵdai qyzmetiniń barlyq resýrsy tartyldy. Qazir 350 arnaiy tehnika, 2 myńǵa jýyq adam tasqynǵa tosqaýyl qoiýǵa jumyldyrylǵan. Sondai-aq ózge óńirlerden, oblys aýdandarynan kelgen áskeri qyzmetshiler, tótenshelikter jáne eriktiler bul jumysqa belsene atsalysyp jatyr.
"Eń bastysy - adamdardyńy amandyǵy. Sondyqtan Jaiyq jaiylymyndaǵy saiajailardyń, sý basý qaýpi joǵary Kýreni, Staritsa, Komintern aýdandarynyń turǵyndary kóshýi qajet. Sýdyń mol kólemi kez kelgen ýaqytta jetip, úiińizdi sý basýy múmkin. Ózińizdiń jáne jaqyn adamdaryńyzdyń ómirin qaýipke tikpei, shuǵyl túrde týma-týys, dostaryńyzdyń úiine ornalasyńyz. Ýaqytsha baratyn úi bolmasa, qalada evakýatsiialyq pýnktter jasaqtalǵan. Olar turǵyndardy kúni-túni úzdiksiz qabyldaidy. Suraqtar boiynsha qalalyq shtabqa 8-711-2-24-05-70 jáne 24-01-94 telefon nómirleri arqyly habarlasýǵa bolady. Evakýatsiiany qazirden bastańyz!", - dep habarlady ákimdiktegiler.
