Jambyl oblysynda qaza bolǵan 19 jastaǵy Madina Rashidqyzyna qatysty kórshisi pikir bildirdi. Aýyl turǵynynyń sózi jazylǵan videony jýrnalist Aigerim Taýbai jariialaǵan, dep habarlaidy ult.kz.
Kórshisiniń aitýynsha, Madina men kúieýi alǵashynda tatý-tátti ómir súrgen. Alaida keiin jas kelinniń minez-qulqynda ózgeris baiqalǵan.
«Ekeýi qol ustasyp júretin. Kelinniń qurbysy kelip, qonyp júrdi. Sodan keiin kelinniń minezi de, túri de basqasha bola bastady. Eliktedi me… Bala tapsa da, balalyǵyn qoimaǵan jas kelin ǵoi», – dedi aýyl turǵyny.
Madina Merki aýdanynda shamamen eki jyl turǵan. Ol Ózbekstan azamaty bolǵan jáne Qazaqstan azamatyna turmysqa shyqqan. Marqumnyń artynda segiz ailyq sábii qaldy.
Buǵan deiin áleýmettik jelide Madinanyń qurbysyna jazǵan hat-habarlary taraǵan edi. Onda jas kelin kúieýimen jii janjaldasatynyn jáne onyń ózine qol kótergenin jazǵan. Sondai-aq hattardyń birinde erli-zaiyptylar arasyndaǵy sońǵy janjaldyń «Barni» táttisine bailanysty bolǵany aitylǵan.
Madina keiin jeke zattaryn jinap, kúieýinen ketip, ajyrasqysy keletinin qurbysyna jetkizgen.
Oqiǵaǵa bailanysty Jambyl oblysynyń politsiiasy «ózin-ózi óltirýge deiin jetkizý» baby boiynsha sotqa deiingi tergeý bastaǵan.
Al marqumnyń týystary onyń ólimine kúmán keltirip, istiń barlyq mán-jaiyn jan-jaqty tekserýdi talap etip otyr.
