Jambyl oblysynda 19 jastaǵy Madina Rashidqyzynyń qazasyna qatysty qoǵamda túrli pikir aitylyp jatyr. Osy jaǵdaiǵa Jan Ahmadiev te ún qatyp, marqumdy negizsiz aiyptaýǵa bolmaitynyn jetkizdi, dep habarlaidy ult.kz.
Ol áleýmettik jelidegi jazbasynda Madinanyń jeke ómirine qatysty boljamdardyń taraýyna qarsylyq bildirdi.
«Madinada kóńildes boldy ma? Madiiardy qorǵaityndar kelse — qorǵandar. Biraq ol úshin ómirden ótken Madinany qaralaýdyń qajeti joq! Ol endi ózine jaýap bere almaidy. Shyndyqty tergeý men saraptama anyqtasyn. Al Madinanyń arýaǵyn qorlaýǵa jol bermeimiz!» – dep jazdy Jan Ahmadiev.
Aita keteiik, Madina Merki aýdanynda eki jylǵa jýyq ýaqyt turǵan. Ol Ózbekstan azamaty bolǵan jáne Qazaqstan azamatyna turmysqa shyqqan. Marqumnyń segiz ailyq sábii qalǵan.
Buǵan deiin áleýmettik jelide Madinanyń qurbysyna jazǵan hattary taraǵan edi. Habarlamalarda jas kelinniń kúieýimen jii urysatyny jáne odan taiaq jegeni aitylǵan. Sondai-aq hattardyń birinde erli-zaiyptylar arasyndaǵy sońǵy janjaldyń «Barni» táttisine qatysty bolǵany jazylǵan.
Madina keiin kúieýinen ketip, ajyrasýǵa nietti ekenin qurbysyna aitqan. Ol jeke zattaryn jinap, úiden ketken.
Oqiǵaǵa bailanysty Jambyl oblysynyń politsiiasy «ózin-ózi óltirýge deiin jetkizý» baby boiynsha sotqa deiingi tergeý bastaǵan.
Al marqumnyń jaqyndary onyń ólimine kúmán keltirip, istiń barlyq mán-jaiyn tolyq ári jan-jaqty tekserýdi talap etip otyr.
