«QTJ» UK» AQ basqarma tóraǵasynyń birinshi orynbasary Qanat Almaǵambetov Alakól 19 maýsymnan bastap ashylatynyn aitty, – dep habarlaidy QazAqparat.
«Ázirge, el azamattary Qazaqstannan tys saparlai almaidy, sondyqtan 1 maýsymnan Dostyq stansasy baǵytynda eki poiyzdyń qozǵalysy iske asyrylady. Al 10 maýsymnan keiin qalǵan poiyzdardyń qozǵalysyn jandandyramyz. Shyǵys Qazaqstan oblysy ákimdigimen ýaǵdalastyq boiynsha 19 maýsymnan Alakóldi ashý josparlanyp otyr. Biz osy jolaýshylar poiyzdaryn iske qosýdy josparladyq», - dedi ol Ortalyq kommýnikatsiialar qyzmetinde.
Sonymen qatar tarifter kóterilmeitinin, biletter burynǵy tarifpen satylatynyn atap ótti.
«Tarifter kóterilmeidi. Biz dinamikalyq baǵa qalyptastyrý júiesin alyp tastadyq. Ózderińiz bilesizder, buryndary jolaýshy 45 kún buryn bilet satyp alsa, onda basqa baǵa bolatyn. Al poiyz júrýge eki kún qalǵan kezde alǵanda bilettiń quny ózgeretin. Áleýmettik mańyzdy baǵdarlardaǵy dinamikalyq baǵa qalyptastyrýdy toqtattyq», - dedi Qanat Almaǵambetov.
